ଚରଣେ ଶରଣ ଦିଅ

ସୁଖ ସାଗରରୁ ମୁକୁତା ସାଉଁଟି 

 ହେଲି ଯାହା ହୀନିମାନ

ବହୁ ଦିନ ଆଶା ହୁଅଇ ନିରାଶା

  ତୁଚ୍ଛ ଲାଗଇ ଜୀବନ

  ଗୁରୁ ଦିଅ ଦିବ୍ୟ ଜ୍ଞାନ 

ତୁମ୍ଭ ଜ୍ଞାନାଲୋକେ ଜଳିଯାଉ ସବୁ 

  ମୋର ଅହଙ୍କାର ମାନ ...୦

ସୁଖ-ଶାନ୍ତି ହେଲା ସାତସପନ ମୋ'

 ଶେଷେ ଗୁରୁ ତୁମେ ସାହା

କାହାକୁ କହିବି କିଏ'ବା ଶୁଣିବ 

  କର୍ମକୁ ନିନ୍ଦଇ ଯାହା

  ଗୁରୁ କର ତୁମ୍ଭେ ଦୟା

ଦୟା ପରସାଦେ ହଟୁ ପରମାଦ 

  ଛାଡୁ ଏ' ସଂସାର ମାୟା ...୧

   

କେତେ ଯେ ଶୁଣିଲି ତୁମ୍ଭ ଯଶ କୀର୍ତ୍ତି 

   ସଦଗୁରୁ ପରଂବ୍ରହ୍ମ 

କିଞ୍ଚିତ ସହାୟ ହୁଅ ବାରେ ଗୁରୁ 

  ବିନତୀ ମୋହର ଘେନ 

  ଦୂର ହେଉ ସବୁ ଭ୍ରମ 

ଜ୍ଞାନ ସଞ୍ଜିବନୀ ସିଞ୍ଚି ଦିଅ ବାରେ 

   ହସୁ ହୃଦ ଉପବନ ...୨

ସଙ୍କଟୁ ଉଦ୍ଧାରି ଢାଳ କୃପାବାରି

  ଚରଣେ ଶରଣ ଦିଅ

କର ଅଧିଷ୍ଠାନ ମୋ'ଚିତ୍ତେ ବହନ

   ଅଜ୍ଞାନତା ହରିନିଅ

   ଦିଅ ଭିନ୍ନ ପରିଚୟ 

ସଂସାର ମଙ୍ଗଳେ ତୁମ୍ଭରି ସନ୍ଦେଶ 

   ରହୁ ସଦା ପୂଜନୀୟ ... ୩