ଅପେକ୍ଷାରେ ତୁମ
ଅପେକ୍ଷାରେ ତୁମ
ବିଶ୍ୱାସରେ ମନ ତୁମକୁ ଦେଇଛି
ବିଶ୍ୱାସ ମୋ ନଭଙ୍ଗିବ
ମନ ଫରୁଆର ସିନ୍ଦୂର ହୋଇ ଯେ
ଜନ୍ମ ଜନ୍ମ ରହିଥିବ !
ମାଗୁ ନାହିଁ ଧନ ଅବା ବଇଭବ
ସୁନା ରୂପା ହୀରା ମଣି
ଚାଲୁଥାଓ ସାଥେ ଛାଇଟିଏ ପରି
ଛନ୍ଦି ବନ୍ଧନର ପାଣି !
କଣ୍ଟା ନୁହେଁ କେବେ ଫୁଲ ବିଞ୍ଚି ଦିଅ
ଚଲାପଥ ଧାରେ ମୋର
ଅପେକ୍ଷାରେ ତୁମ ଅଭିସାରିକା ମୁଁ
କରିନିଅ ଆପଣାର !
ମହକାଇ ଦିଅ ମନ ଅଗଣାକୁ
ପ୍ରୀତିର ପାଖୁଡ଼ା ବିଞ୍ଚି
କେବେ ଆସି ପ୍ରିୟ କହିଦିଅ ଥରେ
ମୁଁ ତୁମର ସବୁ କିଛି !