ଅନୁଭୂତିରେ ଜଗନ୍ନାଥ

କରୋନା ପୂର୍ବରୁ ଅସୁସ୍ଥ ମୁଁ ଥିଲି

ହୋଇଥିଲା ଥଣ୍ଡା,କାଶ,

ଔଷଧ ଖାଇଲି ଭଲ ହେଲାନାହିଁ

ହରାଉଥିଲି ସାହସ |

ଦୀର୍ଘ ଦୁଇମାସ କଷ୍ଟ ମୁଁ ପାଇଲି

ଯନ୍ତ୍ରଣାରେ ଛଟପଟ,

ଗଳା ସଂକ୍ରମଣ ହୋଇଥିଲା ବୋଲି

ଗ୍ରାସିଥିଲା ଯେ ସଙ୍କଟ |

ଏହାରି ଭିତରେ ସ୍ୱାମୀଙ୍କର ବନ୍ଧୁ

ଯାଇଥିଲେ ବୁଲି ପୁରୀ,

ତୁଳସୀ ପ୍ରସାଦ ମୋ ଘର ପାଇଁକି

ଆସିଥିଲେ ସଂଗେଧରି |

ମୋ କଷ୍ଟକୁ ଅବା କାଳିଆ ସାଆନ୍ତ

ସହି ନପାରିଲେ ଆଉ,

ମହାମାରୀ କୋପ ଆସିବା ଆଗରୁ

ଦୂରେଇଲେ ମହାବାହୁ |

ତୁଳସୀ ପ୍ରସାଦ ଖାଇଲି ମୁଁ ଯେବେ

ଭଲହେଲା ରୋଗ ମୋର,

ଭାବର ଠାକୁର ଗୁହାରି ଶୁଣିଲେ

ସଂକ୍ରମଣ ହେଲା ଦୂର |

ଯୁଗେଜୁଗେ ପ୍ରଭୁ ଭକତ ମନକୁ

ତୁମେତ ପରଖୁ ଥାଅ,

ଯାଭାବ ଯେପରି ଆଶିଷ ସେପରି

ସ୍ୱହସ୍ତରେ ଯାଚିଦିଅ |