ଅନୁଭବର ଭାବ
ଅନୁଭବର ଭାବ
ସାଗରର ବକ୍ଷ ମଧ୍ଯେ ଜାତହୁଏ
ମଧୁରତା ଅଂଶୁପାର
କାକର କଣ୍ଠରୁ ଶୁଭଇ କୁହୁତାନ
ଭାବ ଏ ଅନୁଭବର।
ମିଠାଲାଗେ ସବୁ ଶବ୍ଦ ଦିଶେନାହିଁ
ରଙ୍ଗ କୋଇଲିର
ସୂର୍ଯ୍ୟ ଉତ୍ତାପେ ମଧ୍ଯ ଶୀତଳତା
ଭାବ ଏ ଅନୁଭବର।
ନିର୍ଜନ ହୃଦୟ ପଥରେ କେତେ
ଭାବନା କୋଳାହଳର
ନିର୍ମୋହି ମନଟା ମୋହ ଖୋଜେ
ଭାବ ଏ ଅନୁଭବର।
ଅଲୋଡ଼ା ତନୁ ପରଶ, ଆତ୍ମା
ଛୁଇଁ ଯାଉଥାଏ ପ୍ରତିଥର
ଈଶ୍ବର ବାସେ ଏ ବାସିସମ ଜୀବନ
ଭାବ ଏ ଅନୁଭବର।
ସେ ନୟନେ ଦେଖେ ମୁଁ ବାସ୍ତବତାର
ସପନ ସୁନ୍ଦରତାର
ପ୍ରାପ୍ତି ତୁଚ୍ଛ, ଅପ୍ରାପ୍ତିରେ ମହା ଆନନ୍ଦ
ଭାବ ଏ ଅନୁଭବର।
ବଦଳେ ଋତୁ ସ୍ୱର୍ଗୀୟତା ଭାବପଣେ,
ଆତ୍ମୀୟତା ସମ୍ପର୍କର
ସ୍ୱାର୍ଥଠୁ ବହୁ ଉର୍ଦ୍ଧ୍ବେ, ଅନାବିଳ ଅର୍ଚ୍ଚନା
ଭାବ ଏ ଅନୁଭବର।