ଅନ୍ତର୍ଦ୍ଵନ୍ଦ

ମନ ଭିତରେ ସଦା ସର୍ବଦା 

ଆତଯାତ ହୁଅନ୍ତି ଭାବନାମାନେ

ସତେ ଯେପରି,

ତାଙ୍କୁ କିଏ ରାଣ ନିୟମ ପକାଇ କହିଯାଇଛି ,

କେବେ ଛାଡ଼ି ନ ଯିବୁ ଏ ସ୍ଥାନ,

କିଛି ସମୟ ପାଇଁ 

ଏକୁଟିଆ କରି ଛାଡ଼ି ଗଲେ ବି ,

ପୁଣି ଆସି ଆସ୍ଥାନ ଜମେଇବୁ

ସେ ସ୍ଥାନରେ ।

ଏସବୁ ଭାବନାମାନେ

ଏତେ ତୀବ୍ର ଯେ 

ଶୟନେ ସ୍ଵପନେ ଜାଗରଣେ 

କବଳିତ କରିଚାଲନ୍ତି

ମନୁଷ୍ୟର ବୁଦ୍ଧି ବିବେକ ଓ କାର୍ଯ୍ୟକୁଶଳତାକୁ ,

ପ୍ରତି ପାଦେ ପାଦେ 

ସୃଷ୍ଟି କରନ୍ତି ଅନ୍ତର୍ଦ୍ଵନ୍ଦ ।

ସରଳ ମନୋଭାବ ନେଇ

କାହା ଉପରେ 

ଅନ୍ଧ ଭାବେ ବିଶ୍ଵାସ କରିଥିବା

ନୀରିହ ଆତ୍ମାଟି 

ଯେବେ ଠକାମୀର ଶିକାର ହୁଏ ,

ତା' ଭିତରେ ନିତି ମରି ମରି

ଅଳ୍ପ ବଞ୍ଚୁଥିବା ମଣିଷପଣିଆ ଟିକକ 

ପ୍ରତି ମୂହୁର୍ତ୍ତରେ କରୁଥା'ନ୍ତି ଅନ୍ତର୍ଦ୍ଵନ୍ଦ ,

ନିଜ ନିଜ ଭିତରେ

ଠିକ୍ ଓ ଭୁଲ୍ ଭିତରେ ,

ଲୋକହସା ଓ ଆତ୍ମ-ସ୍ବାଭିମାନ ଭିତରେ ।

ଜୀବନ ବି ତ ପାଣି ଫୋଟକା ପରି

ଆଜି ଅଛି ତ କାଲିକୁ ନାହିଁ

ବୟସକୁ ସତେ ଯେମିତି

ଆଖି ମିଟିକା ମାରୁଛି ଆୟୁଷ ,

ଜୀବନ ମରଣର ଏହି 

ଦୋ ଛକିରେ ଠିଆ ମଣିଷ ଭିତରେ

ଜନ୍ମ-ମୃତ୍ୟୁର ଚକ୍ରବ୍ୟୁହ ପାଲଟେ 

ନୀରବ ନିର୍ବିକାର ସ୍ରଷ୍ଟା 

ଏକ ନୂତନ ମାନସିକ ଅନ୍ତର୍ଦ୍ଵନ୍ଦର ।