ଅନ୍ଧାରକୁ ଦୂର କରି

ଅନ୍ଧାରକୁ ଦୂର କରି ପାଳି ଦୀପାବଳୀ

 ଜାଳି ଯିବା ଆସ ଆଜି ସଭିଏଁ ଦୀପାଳୀ ।

ପବିତ୍ର ଉତ୍ସାହ ଆଣି ଆସିଛି ଉତ୍ସବ

 ପାଳନ କରିବା ଆସ ଦୀପାବଳୀ ପର୍ବ ।

କେତେ କେତେ ଖୁସି ଆଉ ମଉଜ ଭିତରେ

 ପରସ୍ପର ଅନୁରାଗ ପ୍ରୀତି ସ୍ରୋତ ଧାରେ ।

ଆଲୁଅ ଜଳ।ଇ ସର୍ବେ ଅନ୍ଧାର ରାତିରେ

ବସାଇବେ ଦୀପ ମାଳା ଗ୍ରାମେ ପୁରେ ନଗରେ ।

ପ୍ରତି କ୍ଷଣେ ଖେଳେ ପ୍ରାଣେ ପ୍ରୀତିର ଲହରୀ

ଅନ୍ଧାରକୁ ଦୂର କରି ପାଳି ଦୀପାବଳୀ ।

ଅନ୍ଧକାର ଭେଦ ଅଭିମାନ ଓ ଆକ୍ରୋଶ

ଦୂରେଇ ସବୁରି ମନେ ବୁଣିବେ ହରଷ ।

କାର୍ତ୍ତିକ ମାସର ଏହି ଅମାବାସ୍ୟା ତିଥି

ଗୃହେ ଗୃହେ ଜାଳି ଦୀପ ଓ ମହମବତୀ ।

ଖୁଣ୍ଟରେ ଝୁଲ।ଇ ନାନା ମତେ ବିଶୋଭାଇ

ଆଲୋକ ପରବ ଭାବେ ପାଳିତ ହୁଅଇ ।

କେତେ କେତେ ଖୁସି ମଧୁମୟୀ ସ୍ୱପ୍ନ ନେଇ

ମନ୍ଦିରରେ ଦୀପ ମାଳା ଗ୍ରାମେ ଗ୍ରାମେ ପୁଣି ।

ସହର ବଜାର ସବୁ ଠାରେ ଦୀପାଲୋକ

କେତେ ସୁମଧୁର ଦିବ୍ୟ ଭାବର ଦ୍ୟୋତକ ।

ଆସ ଆସ ଆମ ଦେଶ ସଭ୍ୟତା ସଂସ୍କୃତି

ଚେତନା ମୂଳକ ପର୍ବ ପାଳି ଦୀପାବଳୀ ।

ଉତ୍ସବ ମୁଖର ହୋଇ ଉଠି ଅଛି ଆଜି 

ବାଜେ ବାଜା ଫୁଟେ ବାଣ ଓ ଆତସବାଜି ।

ପିତୃ ଦେବତାଙ୍କୁ ପୟା ଶ୍ରାଦ୍ଧରେ ତର୍ପଣ 

କାଉଁରିଆ କାଠି ଜାଳି କରନ୍ତି ଆହ୍ୱାନ ।

ଆସିଛି ଆଲୋକ ପର୍ବ ଏହି ଦୀପାବଳୀ

ଉତ୍ସବ ପାଳିବା ସର୍ବେ ଆସ ଦୀପ ଜାଳି ।