ଅନ୍ଧାର ମୁଠାଏ ଦିଅ
ଅନ୍ଧାର ମୁଠାଏ ଦିଅ
1 min
345
ମନ କରିଥିଲି ସାରା ଜୀବନ ମୁଁ
ଚାଲିବି ତୁମର ସାଥେ
ତୁମ ପାଦେ ପାଦ ମିଶାଉଥିବି ମୁଁ
ହାତ ରଖିଥିବି ହାତେ I
ଧୃବତାରା ହୋଇ ଝଟକିବ ତୁମେ
ବାଟ ମୋତେ ଦେଖାଇବ
ପାନ୍ଥଶାଳା ହୋଇ ଆଶ୍ରୟ ଯାଚିବ
କ୍ଳାନ୍ତି ମୋର ମେଣ୍ଟାଇବ I
ନ ଉଇଁବ ଯଦି ନ ଉଅଁ ଲୋ ସଖୀ
ମୋ ଆକାଶେ ହୋଇ ଜହ୍ନ
ଦେବାପାଇଁ ଯଦି ଇଚ୍ଛା କରୁନାହଁ
ଦିଅନାହିଁ ତୁମ ମନ I
ବର୍ଷା ହୋଇ ଯଦି ବରଷିବ ନାହିଁ
ଭିଜାଇବ ନାହିଁ ମୋତେ
ଧୋଇ ନିଅନାହିଁ ଲୁହକୁ ମୋହର
ପୋଛି ଦିଅନାହିଁ ହାତେ I
ନଦେଲେ ନଦିଅ ଆଲୁଅ ଟିିକିଏ
ଅନ୍ଧାର ମୁଠାଏ ଦିଅ
ସେ ଅନ୍ଧାରେ ସଖୀ ଲୁଚିବ ମୋ ଆଖି
ଦିଶିବନି ତୁମ ମୁହଁ I
ନଦେଖିଲେ ନାହିଁ ମୁହଁକୁ ତୁମର
ତୁମ ମନକଥା ଭାବି
ଅନ୍ଧାର ରାତିରେ ଲେଖିବି କବିତା
ଆଙ୍କିବି ତୁମର ଛବି I