ଅନ୍ଧାର ମାଗୁଛି ରାତି

ଗହନ ନିଦରେ ଦେଖିଲି ତୁମକୁ

ମନ ହୋଇଗଲା ଖୁସି

ତୁମ ଆଲୋକରେ ଅନ୍ଧାର ଲୁଚିଲା

ତୁମେ ଦେଲ ଯେବେ ହସି I

ତୁମେ ମାଗିନେଲ ମୋ ପାଗଳପଣ

ଅନ୍ଧାର ମାଗିଲା ରାତି

ତୁମ ମନତଳେ ନିଜକୁ ପାଇଲି

ଉଛୁଳି ଉଠିଲା ଛାତି I

ଝୁମି ଉଠିଲି ମୁଁ ତୁମ ପ୍ରେମେ ସଖୀ

ଝୁମିଗଲା ମୋ ଦୁନିଆ

ସପନେ ସପନ ସଉଧ ଗଢି ମୁଁ

ତୁମ ଆଗେ ହେଲି ଠିଆ ।

ତୁମଦେଲ ମୋତେ ସରଗସୁଖ ଲୋ

ଆଖିରେ ଭରିଲ ନିଦ

ସପନ ସାଗରେ ଦିଗହରା ହେଲେ

ଯେତେସବୁ ଅବସାଦ I

ଅନ୍ଧାର ଆଖିରେ ଜହ୍ନହେଲ ତୁମେ

ରାତିର ଆଖିରେ ସ୍ୱପ୍ନ

ଜୋଛନା ଓଠରେ ଚୁମାଟିଏ ଦେଲା

ମୋର ପ୍ରୀତିଭିଜା ମନ I

ତୁମ ମୁହେଁ ଥିଲା ହସର ଲହଡି

ଓଠ ଦିଶୁଥିଲା ନାଲି

ତୁମରି ମନର ମହାସାଗରରେ

ମୋ ମନ ଭସାଇ ଦେଲି I