ଅନ୍ଧ ପ୍ରେମ

ମୁଁ, 

ତୁମ ପ୍ରେମରେ ଅନ୍ଧ 

ମୋ' ଆଖିରେ ବନ୍ଧା ତୁମପ୍ରତି ଥିବା ମୋହ 

ଭଲପାଇବା ଏବଂ ଅତ୍ୟନ୍ତ ଅନୁରକ୍ତିର

ଅନ୍ଧ ପୁଟୁଳି, କୁହ ପ୍ରିୟେ,

କେମିତିବା ଦେଖି ପାରିବି ମୋ'ଛାତିକୁ 

ଲକ୍ଷ୍ୟକରି ତୁମେ ମାରୁଥିବା ବନ୍ଧୁକର ଗୁଳି ।

ସମୟ ସାରୁଛି

ତୁମପାଇଁ ସଜାଇବାକୁ ଫୁଲର ଦୋଳି 

ଏବଂ ତୁମପାଇଁ ବାନ୍ଧିବାକୁ ସ୍ୱପ୍ନର ନିଶୁଣି,

ସମୟ ପାଇବି କୋଉଠୁ

ପଢିବାକୁ ତୁମ ମନ ଭିତରର କଥା

ଏବଂ ବୁଝିବାକୁ ଭିନ୍ନ ଏକ ଅବୁଝା କାହାଣୀ ।

ତୁମେ କହିଲ

ମୁଣ୍ଡ ନୁଆଇଁଦେଲେ ଚାଲିଯିବ

ଆସୁଥିବା ସମୂଦ୍ରର ବଡ ବଡ ଜୁଆର,

ମୁଁ କ'ଣ ଜାଣିଥିଲି

ମୋ' ଉପରେ ପାଣି ସହିତ ମାଡିଯିବ ବାଲିଚର ।

ମୁଁ ଆଜି ଆହାତ

ଗୁଳିବିଦ୍ଧ କ୍ଷତାକ୍ତ ମଣିଷ,

ତଥାପି ତୁମର ମଙ୍ଗଳ ପାଇଁ ପ୍ରାର୍ଥନା କରୁଛି

ଆମନ୍ତ୍ରଣ କରୁଛି ନିଜେ ନିଜର ସର୍ବନାଶ 

ଏମିତି ନହେଲେ ସୃଷ୍ଟି କୁଆଡେ ହେଇଯିବ ଧ୍ୱଂସ ।