Library
Profile
ଅମୃତ ବିଭବ ତୁରେ
ଅମୃତ ବିଭବ ତୁରେ
କେବେ ମାଗିନାହିଁ ଜୀବନରେ କିଛି
ଦେଇଛ ଯାହା ମୋ ମହା ପ୍ରସାଦ,
ସାଦରେ, ଆଦରେ ସାଉଁଟି ରଖିଛି
କୈବଲ୍ୟ ନାଥ ହେ ନାହିଁ ବିଷାଦ l
ଜୀବନରେ ପ୍ରଭୁ ଜାଣିଛି ଏତିକି
ଯାହା ତୁମ ଇଚ୍ଛା ହୁଅଇ ପୂର୍ଣ୍ଣ,
ସମର୍ପିତ ହୃଦ ଦେଇଛି ସମର୍ପି
ସବୁ ତୁମେ ମୋର ମୁଁ ଅଂକିଞ୍ଚନ l
ତୁମେ ଭାବ ଭବ୍ୟ ହୃଦୟ ବିଭବ
ତୁମ ପରିବାର ତୁମେ ସ୍ବର୍ବସ୍ୱ,
ଚିନ୍ତା, ଚେତନାରେ ମୋର ବାସୁଦେବ
ଗଢ଼ା କଲ୍ୟାଣରେ ଥାଉ ଆଶିଷ l
କୋଟି ଶ୍ରଦ୍ଧା, ସ୍ନେହ ଧନରେ ମୋହର
ହୃଦୟରେ କୋଟିପତି ତୁ ମୋର,
ନିରବ ସାଧନା ଶାନ୍ତ ହୃଦୟର
ଭାବି ବେଳେ, ବେଳେ ଲାଗେ ଅଧିର l
ଛୁଆବେଳୁ ତୁହି ରହିଛୁ ସେପରି
ଭାବମଗ୍ନ ଧନ ସଦା ତୁ ହୋଇ,
ଭାଗବତ ପ୍ରାଣା ଧନରେ ମୋହରି
ରଖନ୍ତୁ ହେ ପ୍ରଭୁ ଧ୍ୟାନ ତୋ ପାଇଁ l
ସଂସାର ଖସଡ଼ା ପଥ ବି ଅମଡ଼ା
ତଥାପି ଚାଲିବୁ ସୁକର୍ମ କରି,
କର୍ମ ଆରାଧନା ନ ଥାଏ ଯାତନା
ପ୍ରଭୁ ଥାନ୍ତି ଦିବ୍ୟ ସନ୍ଦେଶ ଧରି l
ବିବେକ କବାଟ ହୃଦୟର ଛାଟ
ଭାଙ୍ଗେନି କିଏ ସେ ଆଘାତ କଲେ,
ପ୍ରତିଫଳ ହୋଇ ଫେରିଯାଏ ସତ
ନିଷ୍କାମ ଭାବନା ହୃଦୟେ ଥିଲେ l
ଶ୍ରଦ୍ଧା ମମତା ଭରା ମନ୍ଦିରଟିଏ
ହୃଦୟ ରାଗର ତୋ ପ୍ରତି ଶବ୍ଦ,
ସ୍ମିତ ହସ ଧାରେ ବହୁ କଥାସିଏ
କେବେ ପାଏନି ସେ ଜ୍ଞାନର ଭେଦ l
ମାଆ ହୋଇ ଆଜି ଭାବୁଛି ଧନରେ --
କୁନି ହୋଇ ମୋର ରହିଛୁ ପାଖେ,
ପ୍ରତି ମୁହୂର୍ତ୍ତର ଅନୁଭବ ଝରେ
ତୋର ଶ୍ରଦ୍ଧାସିକ୍ତ ହୃଦୟ ଆଗେ l
କାଲି ବି ଭାବିନି ଆଜି ବି ଭାବୁନି
ଚିନ୍ତା ଚେତନା ମୋ ସମର୍ପି ସାଥେ,
ବିଶ୍ୱାସେ ଭରସା ଅତୁଟ ରଖିଛି
ତୋ କର୍ମ, ଧର୍ମ ଯେ ପ୍ରଭୁ ଙ୍କ ପଥେ l
ସାଧୁତାର ସଙ୍ଗ ଦୁର୍ମୁଲ୍ୟ ସଂସାରେ
କୃପାନାଥ ଙ୍କର ଆଶିଷ ଝରେ,
ସେ କରୁଣା ରେଣୁ ଥାଉ ତୋ ମଥାରେ
ଭଲ ମଣିଷ ତୁ ହେବୁ ସଂସାରେ ll
