Library
Profile
ଆତ୍ମାର ମନ୍ଦିର. ପ୍ରଣତି ଜେନା
ଆତ୍ମାର ମନ୍ଦିର. ପ୍ରଣତି ଜେନା
ନିରତେ ଏ ମନ ଖୋଜଇ ସପନେ
ଆହା ଧନମାଳି ମୋର,
ମୁହୂର୍ତ୍ତ, ମୁହୂର୍ତ୍ତ ଝୁରେ ପ୍ରତିକ୍ଷଣେ
ସବୁ ତୁଚ୍ଛ ବିନା ତୋର.. 💐
ଆଜି ଅଛି ମୁହିଁ ସଂସାର ପଥରେ
କାଲି ହେବି ସାତପର,
ମାୟା,ମୋହ ତେଜି ମଶାଣି ଭୂଇଁରେ
ଲୋଟୁଥିବ ଏ ଶରୀର... 💐
ଧନମାନ ଯୁକ୍ତ ବିଯୁକ୍ତ ହୋଇବ
ଆତ୍ମଜ, ଆତ୍ମୀୟ ଠାରୁ,
ଲୋଭର ସମ୍ପତ୍ତି ଛାଡିବାକୁ ହେବ
ଦିନେ ଏହି ସଂସାର'ରୁ...💐
ତୁମେ ମହାଦାରୁ ମୁହିଁ କ୍ଷୁଦ୍ର ତରୁ
ଭିଜୁଛି ସଦା ମଉନେ,
ନିରବ ଦୀପାଳି ସମ ଏ ଆତ୍ମାରୁ
ହରେ କୃଷ୍ଣ ଜପ ଧ୍ୟାନେ.. 💐
ରହିଥିବୁ ତୁହି ମର୍ତ୍ତ୍ୟର ଧାମରେ
ଭକ୍ତ ଭଗବାନ ହୋଇ,
ଶ୍ରେଷ୍ଠ କାରିଗର କୁହୁକ ମନ୍ତ୍ରରେ
ବାନ୍ଧି ଦେଇଅଛୁ ତୁହି
... 💐
ଶ୍ରୀ ମନ୍ଦିର ଭିଡ ହେଉଛି ଯେପରି
ଦୂରୁ ଦେଖି ଲାଗେ ଡର,
ଅନ୍ତଃ କରଣରେ ଅନୁଭବ କରି
ଆତ୍ମା ଯାଉଛି ମନ୍ଦିର... 💐
ନ କରି ନିରାଶ ଦେଖା ଦିଅ ଥରେ
ଆତ୍ମା ସିଂହାସନ ବାସୀ,
"ତମ "ଠାରୁ ତୁମେ ରଖିବ ଦୂରରେ
ବିନମ୍ରତା ହୃଦ ଶଶୀ... 💐
ହୃଦୟ କନ୍ଦରେ ଭିଜା ନୟନରେ
ଗୋପନ ବ୍ୟଥାର ପଥେ,
ସମ୍ମୋହନ ତୁଠେ ଅତ୍ମୀୟତା ଘଟେ
ସାରଥୀ ଶରୀର ରଥେ... 💐
ଏତେ ଆପଣାର ଏକାନ୍ତ ନିଜର
ଆଉ କିଏ କାହିଁ ମୋର,
ଯେଉଁଠି ଯେପରି ଥାଅ ନିରନ୍ତର
ନିଷ୍କାମ ହୃଦୟେ ଘର... 💐
ଶରୀର ରଥକୁ ଆତ୍ମାର ବନ୍ଧନ
ପରମାତ୍ମା ସଦା ପଥେ,
ଗଭୀର ଗହନ ଭାବ ଆବାହନ
ଅଜ୍ଞାନ ଭାବେ ନିରତେ.. 💐
