ଅମାନିଆ ମନ

ହୃଦୟ କାଗଜେ ଲେଖିଦେଲି ବନ୍ଧୁ

  ଯେଉଁଦିନ ତୁମ ନାଁ

ଅଲେଖା କାଗଜ ଗୋଲାପି ରଙ୍ଗରେ

  ମରମେ ପ୍ରୀତିର ଛୁଆଁ 

ମନ ବେଳାଭୂମି ସାଗର ତଟରେ 

 ଶାମୁକା ଗୋଟିଏ ନେଇ

ଅନାଇ ରହିଲି କେବେ ଆସିବୁତୁ

 ସ୍ଵାତୀର ଶିଶିର ହୋଇ 

ଚହଲା ମନର ଲଗାମ ବିହୀନ 

 ଅନୂଢ଼ା କିଶୋରୀ ସାଜି 

ପ୍ରେମର ଫୁଆରା ଆଶା ବୈତରଣୀ 

  ସପନେ ଯାଇଛି ହଜି 

ଶୀତ ସକାଳର କୁହୁଡି ଗହଳେ  

 ତୋର ମୁହଁ ଦିଶିଯାଏ 

ନନ୍ଦନ ବନର ପାରିଜାତ ବାସ୍ନା 

 ତନୁମନ ଛୁଇଁଦିଏ 

ସାଜି ପ୍ରୀତିଛନ୍ଦା ସରମୀ ଲତିକା 

 ଗାଏ ଗୀତ ପ୍ରଣୟର 

ଫଗୁଣର ମିଠା ସପନ କୋଳରେ 

 ଚାହେଁ ପ୍ରୀତି ଉପହାର 

ଦିଗନ୍ତର କୋଳେ ବାଦଲଟେ ସାଜି 

 ବରଷି ଯାଅ ଗୋ ପ୍ରିୟ 

ଭିଜି ଯାଉ ମୋର ଏହି ତନୁ ମନ 

 ସାତ ରଙ୍ଗେ ଫିକା ଦେହ 

ଆଙ୍କିଦିଅ ଥରେ ଫୁଲର ଛବିଟେ 

 ମୋ ମନର କାନଭାସେ 

ତୁମ ବାଟ ଚାହିଁ ଅନାଇ ବସିଛି 

  ଅଭିସାରିକାର ବେଶେ