ଅଲିଭା ଚିହ୍ନ

ସତେ ଯେମିତି ପୃଥିବୀଟା ପାଲଟିଗଲା

ହଠାତ୍ ସ୍ଥିର ନିଶ୍ଚଳ ସ୍ତବିର

ଦିଗନ୍ତ ପ୍ରସାରୀ ନିରବ ନୀର୍ଜନ 

କ୍ଳାନ୍ତ ଅପରାହ୍ନ କେବଳ

ବେଦନା ବିଧୂର ଅନ୍ତରେ

ଦେଇଗଲା ଅନେକ ଅମିମାଂସିତ ଶୂନ୍ୟସ୍ଥାନ

ମଳୟ ଆସି ଫେରିଗଲା ସିନା

ହେଲେ ଅଚୁମ୍ବିତ ରହିଗଲା ଧରା

ନା ନିଦାଘରେ ଥିଲା ଉଷ୍ଣତା

ନା ବର୍ଷାରେ ଥିଲା ମାଦକତା 

ଅନେକ ଶିଥିଳ ନୟନରେ ଥିଲା

ଅସରନ୍ତି ପ୍ରଶ୍ନବାଚୀ କେବଳ

ଏକ ଅନିଶ୍ଚିତ ଭବିଷ୍ୟତକୁ ନେଇ

ଚାଲିଲା ଅନେକ କଳ୍ପନାଜଳ୍ପନା

କାହିଁକି ପ୍ରକୃତି ତୋଳିଲା ତାଣ୍ଡବ ??

କାଳର କରାଳ ଗର୍ଭରେ ଲୀନ ହୋଇଗଲେ ଅନେକ

ପାନ୍ଥଶାଳାର ରିକ୍ତ କାନ୍ଥରେ ଆଙ୍କି ହୋଇଗଲା

ଅଜସ୍ର ପଥିକଙ୍କ କରୁଣ ଗାଥା

ଅସଂଖ୍ୟ କବର ତଳେ

ଚାପି ହୋଇଗଲା କେତେ ଯେ ଅକୁହା କଥା

ଅଛିଣ୍ଡା ଅଙ୍କର ବଳକା ଭାଗଶେଷ ଯେତେ

ଯୋଡ଼ି ହେଇଗଲେ ଏକ ନୂତନ ସମ୍ଭାବନା ସାଥେ

ସଭ୍ୟତାର ଏଇ ଅଭିନବ ସଂଗ୍ରାମ

ଇତିହାସ ପୃଷ୍ଠାରେ ରହିବ ହୋଇ ଅଲିଭା ଚିହ୍ନ ।।