ଅଜଣା ଆତଙ୍କ
ଅଜଣା ଆତଙ୍କ
ସମଗ୍ର ବିଶ୍ୱରେ ଅଜଣା ଆତଙ୍କ
ଦେଖାଉଛି ତା'ର ଠାଣି
ବରତିବା ବାବୁ ନୁହଁଇ ସହଜ
ହେଉ ଅବା ରାଜା ରାଣୀ ।
କରୋନା ବଇରୀ ଲୁଟିନେଇଅଛି
ସୁଖ ଶାନ୍ତି ଜୀବନରୁ
ଧନ ପ୍ରତିପତ୍ତି ଅଲୋଡ଼ା ସାଜିଛି
ସ୍ୱାର୍ଥପର ସମାଜରୁ ।
ଧନୀ କି ଗରିବ କରେନା ପ୍ରଭେଦ
ମହାମାରୀ କରି ଗ୍ରାସ
ଅସାବଧାନତା ପ୍ରଭାବ ବିସ୍ତାରି
ଜୀବନ କରୁଛି ନାଶ ।
ମୋହମାୟା ଜାଲ ଛିଣ୍ଡାଇ ଦେଉଛି
ତାହାରି କରାଳ ରୂପ
ଆତ୍ମୀୟ ବି ଏଠି ଅଚିହ୍ନା ସାଜନ୍ତି
ଭାଗ୍ୟର ଅସହ୍ୟ କୋପ ।
ପ୍ରତି ମୁହୂର୍ତ୍ତରେ ଆଶା ଅଶଙ୍କାରେ
ଜୀବନ ଲାଗୁଛି ତୁଚ୍ଛ
ଈଶ୍ୱର ବିଶ୍ୱାସ ହୋଇଲାଣି ଶେଷ
ଅସ୍ତିତ୍ୱ କି ଅବା ମିଛ ?
ଲୁଚି ରହିଅଛି ମଣିଷ ସମାଜ
ଗୃହବନ୍ଦୀ ଉପାୟରେ
ବୈଜ୍ଞାନିକ ଜ୍ଞାନ କଉଶଳ ଯେତେ
ପରଖୁଛି ସ୍ୱଜ୍ଞାନରେ ।
ମୃତ୍ୟୁର ଖେଳରେ ମଣିଷ ହାରୁଛି
କରୋନା କହୁଛି ଗର୍ବେ
ହିଂସା,ଲୋଭ ମୋହ,ଗର୍ବ ,ଅହଂକାର
ମନରୁ ହଟାଓ ସର୍ବେ ।
କେହି ନୁହେଁ କା'ର ମିଥ୍ୟା ଏ ସଂସାର
ଅଳିକ ଜୀବନ କାୟା
ସୁଖ ଅନ୍ୱେଷଣେ ଭୁଲନାହିଁ ଶାନ୍ତି
ତୁଟାଇ ଦିଅ ସେ ମାୟା ।
ଭାଗ୍ୟ ଭଗବାନ ତୋ ଜୀବନ ସ୍ରଷ୍ଟା
ବିଶ୍ୱାସକୁ କର ଶକ୍ତ
ପାପ ଆଚରଣ କୁଚିନ୍ତନ ଠାରୁ
ଆତମାକୁ କର ମୁକ୍ତ ।
ଅଜଣା ଆତଙ୍କ ବିଭୀଷିକା ଦୃଶ୍ୟ
ଶ୍ରେଷ୍ଠତ୍ଵକୁ କରେ ନିନ୍ଦା
ସରଳ ଜୀବନ ଯାପନ କରିଲେ
ଦୁଃଖ ହେବ ମନୁ ବିଦା ।