ଅଜାଗା ଘା'

ଜୀବନ ଯେଉଁଠି ଜିଦି, ଜୁଆଖେଳ,

ନଥାଏ କାହାରି କାହା ସାଥେ ମେଳ l

କେବେ ଜାଗିଉଠେ ଜିଣିବାର ନିଶା,

କେବେ ପୁଣି ହାରି ଆଚରଣେ ହିଂସା l

ମାୟା ଜାଲେ ଆଜି ଶିକାର ସଭିଏଁ,

ମରୀଚିକା ପଥେ ଧାବମାନ ପ୍ରାୟେ l

ଆରାମରେ କିଏ ଜୀଏଁ ମାଗି ବଟି,

ଭିଟାମାଟି ଛାଡି କିଏ ଯାଏ ଖଟି l

ନିରୀହ ଖଟଇ ତାଡନା କବଳେ,

ଶିଶୁ ଖଟୁଥାଏ ପେଟର ବିକଳେ l

ନିଆଶିରୀ ନାରୀ ଆପଣାଏ କୋଠି,

କ୍ଷୁଧାର ଜ୍ୱାଳାରେ ଖୋଜିବାକୁ ରୋଟି l

ଗ୍ରହୀତା ନବୁଝେ ଗୃହିଣୀର ମୂଲ,

ପରକୀୟା ପାଇଁ କରେ କଲବଲ l

ଦୁରାଚାର ପ୍ରତି ଦୁଆରେ ଦୁଆରେ,

ରାଜୁତି କରଇ ହୀନ ମାନସରେ l

ରାଜନେତା ସଦା ଅଜର ଅମର,

କଉଶଳେ ଲଭି ମନ୍ତିରୀଠୁଁ ବର l

କଳା ବଜାରୀର କଚେ ପୋ' ବାର,

ନେତା, ଚାବିଦିଆ କଣ୍ଢେଇ ଯାହାର l

ତେଲ ମାଖି ଶୁଏ ନାହିରେ ପୁଲିସି,

ଉପୁରି ପାଇଲେ ଗେମ୍ଫଇ ଇଲିସି l

ପୁଞ୍ଜି ନିବେଶକ ଏ ଜାତିର ମଣି,

ଖାଇ ଖାଇ ଖୋଳ କରନ୍ତି ସେ ଖଣି l

ପାଣି ପାଇଁ ଏଠି ମିଛଟାରେ କଳି,

ମେଜ ତଳେ ପୁଣି ହାତ ମିଳାମିଳି l

ଅଜାଗାରେ ଘା' ଦିଶଇ କାହାକୁ,

ଆହାଃ ବୋଲି ଯାହା ଶୁଭଇ ବାଆକୁ l

ସତରେ ଶୁଭୁଛି, ଦିଶୁଛି ଯାହାକୁ,

ବସିଅଛି ବନ୍ଦ କରି ସେ ମୁହଁକୁ l