ଅଗ୍ରପୂଜ୍ୟ ଶ୍ରୀଗଣେଶ

    

ଜ୍ଞାନ ବୁଦ୍ଧି ସିଦ୍ଧିଦାତା ଆରାଧ୍ୟ ଦେବ

ଯିଏ ମାତା ପାର୍ବତୀ ଶୈଳ ସୁତା ଦେବୀଙ୍କ 

ସ୍ନାନ କାଳେ ହଳଦୀ ଚନ୍ଦନ ବିଲୋପନର

ମଳକୁଟିରୁ ନେଇ ଏକ ପିତୁଳାର ରୂପରେଖ 

ପାଇଥିଲେ ଦିବ୍ୟ ଚେତନାରେ ଜୀବନ୍ୟାସ

ସେ ଅଗ୍ରପୂଜ୍ୟ ଶ୍ରୀଗଣେଶ

ରୁଦ୍ଧଦ୍ଵାରେ ରଖି ତାଙ୍କୁ ଦ୍ଵାରପାଳ

ଧ୍ୟାନେ ନିମଗ୍ନା ଥିଲେ ଦେବୀ ଗିରି ଗୁମ୍ପା ମଧ୍ୟେ

ଦର୍ଶନାଭିଳାଷୀ ଦେବ ଦେବ କୈଳାସ ପତି

ମହାଦେବ ଶିବ ଶମ୍ଭୁ ସଂହାରକାରୀଙ୍କୁ 

କରିବାରୁ ସଶସ୍ତ୍ରେ ଦୃଢ଼ ଭାବେ ପ୍ରତିରୋଧ

କୋପେ ତ୍ରିଶୂଳ ଆଘାତେ ରୁଦ୍ର ଶଙ୍କର 

ଅଜ୍ଞାତେ କଲେ ଯାହାଙ୍କୁ ନିହତ ହୋଇ ବିବଶ 

ସେ ଅଗ୍ରପୂଜ୍ୟ ଶ୍ରୀଗଣେଶ

ଦେଖି ପିତାପୁତ୍ରଙ୍କ ଯୁଦ୍ଧର କରୁଣ ପରିଣତି

ମାତାଶ୍ରୀ ଶୋକରେ କଲେ ଅଶ୍ରୁ ବିସର୍ଜନ

ଜାଣି ସତ୍ୟାସତ୍ୟ ମର୍ମାହତ ହେଲେ ଭୋଳାନାଥ

ବଞ୍ଚାଇବାକୁ ପୁନର୍ବାର ଖୋଜିଲେ ଶିର

ନ ପାଇବାରୁ କାଟି ଆଣି ଗଜ ଶିଶୁର ଶିର

ସଂଯୋଗ କରି ଦେଲେ ଜୀବନ ଦାନ

ଯାହାଙ୍କଠାରୁ ଦିବ୍ୟଜ୍ଞାନର ହୁଏ ପ୍ରକାଶ 

ସେ ଅଗ୍ରପୂଜ୍ୟ ଶ୍ରୀଗଣେଶ

ଏ ଅନର୍ଥର ପ୍ରତିକାର ସୁଚିନ୍ତି ଦେବଗଣ

ଦେବଙ୍କ ମଧ୍ୟରେ କରିବାକୁ ଅନନ୍ୟ ସ୍ଵତନ୍ତ୍ର

ସର୍ବେ କଲେ ଆଶୀର୍ବାଦ ପ୍ରଦାନ 

ଦେଲେ ତାଙ୍କୁ ଅସରନ୍ତି ଅନନ୍ତ ଜ୍ଞାନଶକ୍ତି 

କୃଷ୍ଣ ଦୈପ୍ୟାୟନ ଶ୍ରୀ ବ୍ୟାସଦେବ ମହର୍ଷିଙ୍କ 

ଶ୍ରୀମୁଖରୁ ବାଣୀ ଶୁଣି ଲିପିବଦ୍ଧ କଲେ 

ଜ୍ଞାନସାର ଅଦ୍ୱିତୀୟ କାବ୍ୟ ମହାଭାରତ

ଲଭିଲେ ବ୍ରହ୍ମାଣ୍ଡେ ଯିଏ ଅଶେଷ ଯଶ 

ସେ ଅଗ୍ରପୂଜ୍ୟ ଶ୍ରୀଗଣେଶ

ଜ୍ଞାନର ସାଗର ବିଶାଳ ଆକାଶ ପରି ଶାନ୍ତ ନମ୍ର

ପ୍ରଭୁ ବିଘ୍ନନାଶକ ବିଘ୍ନେଶ୍ୱର ଗଣନାଥ 

ଅଣୁ ପରିମାଣର ତାଙ୍କର ଶୁଭାଶିଷ ଦାନ 

ମୁର୍ଖକୁ କରାଏ ମହାପଣ୍ତିତ ବିଶେଷ 

ନିର୍ବାକ୍ ମୁକକୁ କରାଏ ପ୍ରଗଳ୍ଭ ବାଗ୍ମୀ ବକ୍ତା

ଜ୍ଞାନାନ୍ଧକୁ ଦିଏ ସୂର୍ଯ୍ୟଙ୍କ ସମ ଜ୍ଞାନର ଜ୍ୟୋତି

ଯାହାଙ୍କ କରୁଣା ଲାଗି ସଭିଏଁ କରନ୍ତି

ଧ୍ୟାନ ଧାରଣାରେ ପୂଜା ଅର୍ଚ୍ଚନା ବ୍ରତ ଉପବାସ

ତାଙ୍କୁ କୋଟି କୋଟି ପ୍ରଣାମ କରେ ବିଶ୍ଵ 

ସେ ଅଗ୍ରପୂଜ୍ୟ ଶ୍ରୀଗଣେଶ।