Library
Profile
ଅଦିନିଆ ବର୍ଷା
ଅଦିନିଆ ବର୍ଷା
ଏପ୍ରିଲ ମାସରେ କେବେ ଥରେ ଥରେ
ହୁଏ ଅଦିନିଆ ବର୍ଷା
ଆକସ୍ମିକ ବର୍ଷା ଆଣଇ ଦୁର୍ଦ୍ଦଶା
କଷ୍ଟ ଭୋଗିଥାଏ ଚଷା |
ନିଦାଘ ଋତୁରେ ଆକାଶ ବୁକୁରେ
ଧଳା କାଦମ୍ବିନୀ ଖେଳ
ସହସା ପ୍ରକାଶ୍ୟ ଦାମିନୀ ସହାସ୍ୟ
ଧୂମାଳ ବାରିଦ ମେଳ |
ତୀବ୍ର ପ୍ରଭଞ୍ଜନ ଦମ୍ଭୋଳି ଗର୍ଜନ
ଭୀଷଣ କରକା ପାତ
ଭାଙ୍ଗେ କଚାଘର ଲୋଟେ ତରୁବର
ଇଟା ଭାତି ଧୂଳିସାତ |
ଉଡ଼ିଯାଏ ଚାଳ ଭାସେ ଅନ୍ନ ଥାଳ
ସହସା ସାଜେ ପ୍ରଳୟ
ବିରି ମୁଗ ରାଶି ସୋରିଷ ଅଳସୀ
ଶସ୍ୟ
ରାଜିର ବିଲୟ |
ବସା ଶୁଖା ଧାନ ଜାଳ କାଠମାନ
ବର୍ଷା ଜଳେ ହୁଏ ଆର୍ଦ୍ର
ଆତଙ୍କ ଖେଳାଏ ଯିଏ ଯହିଁ ଥାଏ
ଦୈବ ସାଧିଥାଏ ବାଦ |
ସନ୍ତାପିତ ଧରା ବରଷା ଅସରା
ପାଇ ହୁଏ ବାସ୍ନାୟିତ
ବାଷ୍ପ ବିନିର୍ଗତ ଉଷ୍ମ ବାତାବର୍ତ୍ତ
କରେ ପ୍ରାଣ ଆମୋଦିତ |
ବଜ୍ର ବିଦ୍ୟୁତର ଦୃଶ୍ୟ ଭୟଙ୍କର
ହୁଏ କାର ପ୍ରାଣପାତ
କ୍ଷତି ଛଡ଼ା ଲାଭ ନାହିଁ ଏଥି ଭାବ
ଏ ପ୍ରାକୃତିକ ବିତ୍ପାତ |
ହଠାତ ଆସଇ ମୁଷଳେ ବର୍ଷଇ
ନଥାଏ କାହା ଆୟତ୍ତ
ଆଶ୍ରୟ କେବଳ ଅଟେ ଛାତ ତଳ
ସହାୟ ଦେବ ଅନନ୍ତ ।
