ଅଧୁରା ସାକ୍ଷାତ
ଅଧୁରା ସାକ୍ଷାତ
ହଁ ଏମିତି ହିଁ ହୁଏ
ଅଧା ରହିଯାଏ ଅନେକ ସାକ୍ଷାତ
ହେଉ ପଛେ ଦୀର୍ଘ କିମ୍ବା ସୀମିତ ଭେଟରେ
କିଛି କଥା ମୁହଁ ଖୋଲିବା ଆଗରୁ
ଅଟକିଯାଏ କୁଣ୍ଠିତ ଜିହ୍ୱାରେ
କିଛି କଥା ମିଳାଇ ଯାଏ ଧୀର ପବନରେ
ଆଉ କିଛି କଥା ଅବୁଝା ରହିଯାଏ
ବାକ୍ୟ ଓ କର୍ଣର ଅସାମଞ୍ଜସ୍ୟରେ।
ଭାଵନା ମାନେ ଆଗପଛ ହୁଅନ୍ତି
ରୂପ ପରିଗ୍ରହ କରିବାକୁ ଶବ୍ଦର ଛାଞ୍ଚରେ
କିଛି ଭାଵନା ପ୍ରଗଳ୍ଭ ହୁଅନ୍ତି
ଜିତିବାର ଢେର୍ ଆନନ୍ଦରେ
ଆଉ କିଛି ଶୋଇଯାନ୍ତି
ବିସ୍ମୃତିର ଆରାମ ଶେଯରେ।
ଆଉ କିଛି କହିଥାନ୍ତି କି
ଭାବି ଭାବି ମନ ହୁଏ ଭାରି ଆନମନା
ଆଉ କିଛି ଶୁଣିଥାନ୍ତି ବୋଲି
ଅସମ୍ପୂର୍ଣ୍ଣ ରହିଯାଏ ଅଜସ୍ର ସମ୍ଭାବନା
ଅବଶ୍ୟ ସବୁ କିଛି ସରିଯାନ୍ତା ଯଦି ଗୋଟିଏ ସାକ୍ଷାତକାର
କେମିତି ହୁଅନ୍ତା କୁହ ପୁନର୍ମିଳନର
ଆଉ ଏକ ନବ ସଂରଚନା !
ବାକି ରହିଯାଏ ଅନେକ କିଛି
ସାକ୍ଷାତଟିଏର ପରିସମାପ୍ତି ପରେ
ଆଉ କିଛି କହିବାର ଥିଲା ବୋଲି
ଅଧା ଅଧା ଲାଗେ ଭାରି ଫେରିଗଲା ପରେ
ବସା ବାନ୍ଧେ ଅନେକ ଅଭିଯୋଗ ଓ ଅଭିମାନର
ବୁଢିଆଣୀ ଜାଲ ସବୁ
ମୋ ଆଉ ତୁମ ମନର ଘର ଭିତରେ
ଓ ବାଟ ଫିଟେ ଆଉ ଏକ ସାକ୍ଷାତର
ପ୍ରତିଟି ଅଧୁରା ସାକ୍ଷାତର ଠିକ୍ ପରେ ପରେ।