ଅଧୁରା କାହାଣୀ

ସୂରୁଜ ଉଦିଲେ ପାହିଯାଏ ରାତି

ତନ୍ଦ୍ରା ଯାଇଥାଏ ଭାଜି

ସପନ ବେଶୀକୁ ଅଣ୍ଟେ ନାହିଁ ରାତି

ରହିଯାଏ କିଛି ବାକି ।

ନୂଆ ସକାଳରେ ନୂତନ ଆହ୍ୱାନ

 ବତ୍ସା ଛାଡେ ହମା ରଡି

ସଞ୍ଚରେ ପବନେ ମୃଦୁ ଗୁଞ୍ଜରଣ

ଶୁଭେ ପକ୍ଷୀଙ୍କ କାକଳି ।

ହୁଏ କର୍ମ ରତ ଜୀବନ ସତତ

ଆହରଇ ଆଜୀବିକା

ଚଞ୍ଚଳେ ପବନ ହସଇ ସ°ସାର

ଫୁଲେ ଫଳେ ସବୁଜିମା ।

ଈଶ୍ୱରଙ୍କ ସୃଷ୍ଟି ଏହି ରଙ୍ଗମଞ୍ଚ 

ଜୀବନ ନାଟକ ଅଙ୍କ

ମଣିଷ ମାତ୍ରକ କରେ ଅଭିନୟ

ଉଚ୍ଚରେ ନିଜ ସ°ଳାପ ।

ଆଚାର ବିଚାର ସମ୍ବନ୍ଧ ସମ୍ପର୍କେ

ଅବିକଳ ଅଭିନୟେ

ଜୀବନ କାହାଣୀ ହୁଏ ଗତିଶୀଳ

ପରିଣାମ କିଛି ମିଳେ ।

ପୂର୍ଣ୍ଣ ହୁଏ ଯେବେ ଜୀବନ ଆକା°କ୍ଷା

ଭାବ ପ୍ରେମ ମନସ୍କାମ

ଲଭଇ ମଣିଷ ତୃପ୍ତି ସାର୍ଥକତା

ଶାନ୍ତି ସନ୍ତୋଷ ଆନନ୍ଦ ।

ଅସମ୍ପୂର୍ଣ୍ଣ ଯଦି ଜୀବନ କାହାଣୀ

ଅଧୁରା ଜୀବନ ପ୍ରେମ

ଆଖିରୁ ଝରାଏ ଅଶ୍ରୁର ଝରଣା

ଦୁଃଖାନ୍ତ ପରିଣାମ ।