ଅଧିନ ଜନତାର ଗୁହାରି

ସ୍ୱାଧୀନ ଦେଶର ଅଧୀନଜନତା

               ଜଣାଏ ମୁଁ ଆଜି ହାତଯୋଡି,

ତୁମପିଲା ସହ ମୋ ପିଲା ବସି

             ପାରୁନି କାହିଁକି ପାଠପଢ଼ି |

ମୋ ପିଲା କିଆଁ ଜରି ଗୋଟାଉଛି

               ଯାଇପାରୁନାହିଁ ପାଠ ପଢ଼ି,

ରୋଗହେଲେଟିକେ ଔଷଧ ପାଉନି

               ମରୁଛି ରୋଗରେ ସଢ଼ିସଢ଼ି |

ମୋଝିଅ ଯାଇ ବାସନ ମାଜୁଛି

ଏ ସାଇ ସେସାଇବୁଲିବୁଲି,

କାମକରିବାକୁ ନ ଗଲେ ଦିନଟେ

              ଜଳେନାହିଁ ମୋର ଘରେ ଚୁଲି |

ମୁଁ କିଆଁ ପିନ୍ଧି ସାତସିଁଆ ଲୁଗା

               ବାସନ ମାଜୁଛି ତୁମଘରେ,

ତୁମେ କିଆଁ ବସି ଚଉକି ଉପରେ

               ହୁକୁମ ଝାଡୁଛ ମୋ ଉପରେ |

ଗାଆଁରେ ଗାଆଁରେ ଭାଟି ଖୋଲିଦେଲ

              ନିତି ମୋ ଲୋକ ମଦପିଏ,

ରୋଜଗାର ଯାହା କରିଥାଏ ତାକୁ

             ସେହିଠାରେ ଛାଡି ଆସିଥାଏ |

ମୋଘରେ ଚୁଲି ଦିଦିନରେ ଜଳେ

             ନିତି ଚାଲିଥାଏ ମାରପିଟା

ଭଲମନ୍ଦ ସେତ ବହୁଦୂରେ ମୋର

            ଘରେନାହିଁ ଖଣ୍ଡେ ଲୁଗାପଟା |

ସରକାର ଖଣ୍ଡେ ଘର ଦେଇଥିଲେ

               ଛାଡିଗଲାଣି ତା ପଲସ୍ତରା,

ବରଷେ ହୋଇନି ପାଣି ଗଳିଲାଣି

              ଓଦାହୁଏ ମୋର ଘରସାରା |

ସରକାର ଆମ ଦେଇତନାହାନ୍ତି

             ଶିଶୁ ଶ୍ରମିକକୁ ଅନୁମତି,

ପିଲାଯଦି ଆମ କାମ ନ କରିବେ

               ଉପାସ ରହିବୁ ଆମେ ନିତି |

ଅଗଷ୍ଟପନ୍ଦରେ ସ୍କୁଲ୍ ଯାଇଥିଲି

             ପଚାରିଲେ ସେଠି ମୋତେ ଦିଦି, 

ସ୍ୱ।ଧୀନତା ମାନେ କ'ଣ ବୁଝୁଛ

              କହିଲି ମୁଁ ପାଏ ସେଉବୁନ୍ଦି |

ମୋରକଥା ଶୁଣି ହସିଲେ ସମସ୍ତେ

              ମନେ ମୋ ଆସିଲା ଭାରିଭୟ,

ବହୁ ଭାବିଭାବି କହିଲି ନେତାଙ୍କ

                ଭାଷଣକୁ କରୁ ଜୟଜୟ |

ତଥାପି ହସିଲେ ଭାବୁଛି ମୁଁ ଏବେ

                 ବୁଝିପାରିନାହିଁ ମୁଁହି ଯାହା,

ଅଧୀନ ଜନତା ହାତଯୋଡି କହେ

             ବୁଝାଇଦେବ କେ ମୋତେ ତାହା |