ଅଦ୍ଭୁତ ସମ୍ୱନ୍ଧ

ସିନ୍ଧୁ ରାଜ ଜେମା ସ୍ଵ ଗୁଣେ ଉତ୍ତମା

   ଧରିଲେ ପ୍ରଭୁଙ୍କ କର

ମହା ସିନ୍ଧୁ ରାଜ ନିତି ସଜ ବାଜ

    ଧୁଅନ୍ତି ପଦ ଯୁଗଳ

ପ୍ରଭୁ, ଏହି କି ଅଦ୍ଭୁତ ଖେଳ ।

ସାଗର ବକ୍ଷରୁ ରୂପେ ହୋଇ ଦାରୁ

    ଜନ୍ମିଲ ବୈକୁଣ୍ଠ ନାଥ

ସିନ୍ଧୁ ପୁତ୍ର ତୁମେ ନିତି ଯେ ଚରଣେ

     ସିନ୍ଧୁ କରେ ପଦ ଧୌତ

କୁହ ଜଗନ୍ନାଥ ଏକି ବିପରୀତ

    ଅଡୁଆ ସୁତାର ଖେଳ ।

ଲକ୍ଷ୍ମୀ ମାତା ଜନ୍ମେ ସାଗର ମନ୍ଥନେ

    ହେଲେ ସିନ୍ଧୁ ସୁତା ମାତ

ସମ୍ବନ୍ଧରେ ଭାଇ  ଭଉଣୀ ତ ହୋଇ

    କେମିତି ଧରିଲ ହାତ

ଆଉ କିଛି ସତ ଅଟେ ଏ ବୃତ୍ତାନ୍ତ

    କୁହ ଗୋବିନ୍ଦ ଗୋପାଳ ।