ଅଭୁଲା ମୁହୂର୍ତ୍ତର ସ୍ତୁତି.
ଅଭୁଲା ମୁହୂର୍ତ୍ତର ସ୍ତୁତି.
ଆଦ୍ୟାଶକ୍ତି ମହାଶକ୍ତି ପରମା କଲ୍ୟାଣୀ
ସର୍ବଜ୍ଞା,ବୁଦ୍ଧିପ୍ରଦା ହେ ଅଚିନ୍ତ୍ୟରୂପିଣୀ,
ଆଶ୍ରୟ ଦାୟିନୀ ଗୁଣତ୍ରୟ ବିମଣ୍ଡିନି
ମହାବିଦ୍ୟା ଭଗବତୀ ଭବାବ୍ଧି ତାରିଣୀ ।
ଭଗବତୀ ଆଦ୍ୟା ଅଟ ନଗରାଜ ଜେମା
ଦେବତା ଙ୍କୁ ଅଲଭ୍ୟ ମା 'ଭାବ ପ୍ରିୟତମା,
ସ୍ୱକର୍ମାର୍ଜିତ ଦୁଃଖ ଭୋଗେ ଏ ନରକାୟା
ଅନ୍ତରଯାମିନୀ ସତେ କରିବ ସୁଦୟା ।
ତୁମେ ବୁଦ୍ଧି, ଶକ୍ତି, କାନ୍ତି,ଲକ୍ଷ୍ମୀ, କ୍ଷମା,ଶାନ୍ତି
ଶ୍ରଦ୍ଧା, ମେଧା, ସୁବିଦ୍ୟା,ଗାୟତ୍ରୀ, ଧୃତି, ସ୍ମୃତି,
ତ୍ରିଭୁବନେ ଇଚ୍ଛା ଦୟାରୂପେ ଅବସ୍ଥିତି,
ସର୍ବଦା ଚିନ୍ତଇ ମା 'ଶ୍ରୀପଦ ମହାଶକ୍ତି ।
ହୃଦପଦ୍ମେ ମା'ଗୋ ବସି ଦିଅ କାବ୍ୟଶକ୍ତି
ନବପଞ୍ଚ ପୁର ଆଦ୍ୟାଦେବୀ ପରାଶକ୍ତି,
ରସୁ ମୋ ହୃଦ ମାନସ ତଵ ଶ୍ରୀ ମୂରତୀ
ଅନନ୍ତ ବୀର୍ଯ୍ୟଶାଳିନୀ ମା'ଗୋତୁମ ଶକ୍ତି ।
ଅଚଳା ଭାବ,ମା 'ତଵ ହେଉ ସୁମରଣ
ଦେବୀ ଭଗବତୀ ମାଲୋ ସଦା ତୋ ଶରଣ,
ଉପେକ୍ଷା ନ କର ମା'ଗୋ କାତର କଷଣ
ଜାଣେ ତୋ ଅନ୍ତଃକରଣ କରୁଣାରେ ପୂର୍ଣ୍ଣ ।
ସମସ୍ତ କାରଣର ମା କାରଣ ରୂପିଣୀ
ଦେବ, ଦେବୀଙ୍କର ମାଲୋ ଅଟୁ ତ ଜନନୀ,
ସକଳ ମଙ୍ଗଳମୟୀ ମା'ଲୋ ନାରାୟଣୀ
ଏ ଜଞ୍ଜାଳ ଜାଲଗୃହେ ଚିନ୍ତୁଛି ନ ରମି ।
ତ୍ରିତାପହାରିଣୀ ମାଆ ତ୍ରିଶକ୍ତିରୂପିଣୀ
ତ୍ରିବେଣୀ ସ୍ୱରୂପା ମାଆ ତ୍ରିପାପନାଶିନୀ,
ତ୍ରିକାଳରେ ସ୍ମରଣେ ମା 'ତ୍ରିକାଳ ଦର୍ଶିନୀ
ତ୍ରିଅଇରୀ ବିନାଶିନି ତ୍ର୍ୟମ୍ବକ ଘରଣୀ ।
ତୋ ସେବା ବିନା ଧିକ ଏ ମାନବର ଶ୍ରମ
କେଉଁ ପାପ ଫଳେ ଭୋଗେ ଯନ୍ତ୍ରଣା ବିଷମ,
ମିଛ ଏ ସଂସାର ମାୟା ମାୟାରେ ଉତ୍ତମ
ମୋହ ପଙ୍କେ ଭୁଲିଅଛି ଅଧମ ତୋ ନାମ ।
ବିଷୟାରସରେ ମଜ୍ଜି ତୋତେ କି ପାଇବି
ବିଷରୁ ବିଷମ ମୋହ ସତେ ତୁଟାଇବି,
ଅନୁଗ୍ରହ ହେବ ଅଧମ କି,ଜଣାଇବି
ଇଚ୍ଛାମୟୀ ମା'ମୋର ଯାହା ତୋ' ଇଚ୍ଛା ଭାବି ।