ଅଭିସାରିକା

ତୁମେ ଆସିବ ବୋଲି

ନାଇଁ ଦେଲି ପ୍ରତୀକ୍ଷାର କଜ୍ଜଳ ଧାରେ

ନିଗାଡ଼ି ଦେଲି ଯେତେ ଯେତେ

ଲୁହ ଆଉ କୋହ ସବୁ

ତୁମ ଅଲକ୍ଷରେ

ଫଗୁଣକୁ ଦେଇଦେଲି ରାଣ

ବହିଯିବା ପାଇଁ

ମୋ ଅଗଣା ଦେଈ

ମଳୟକୁ ମଧୁ ମାସେ ଛୁଇଁଯିବା ପାଇଁ

ଓଠ କିଆରୀରେ ବୁଣିଦେଲି

ଚୁନି ଚୁନି ହସର ପାଖୁଡା

ହୃଦୟରେ ଭରିଦେଲି

ପ୍ରେମ ଖାଲି ପ୍ରେମର ପସରା

କବରୀରେ ଭରିଲି

ରାତିର ଗାଢ଼ତା ଆଣି

ପାଦରେ ବାନ୍ଧିଲି

ଚଞ୍ଚଳ ନୁପୁର ରାଗିଣୀ

ଦେଇଥିଲ ଯେତେ ସବୁ

ପ୍ରତାରଣା ଦାଗ

ଲେପିଲି ତା ଉପରେ

ବହଳ ପ୍ରେମର ରଙ୍ଗ

ରାଶି ରାଶି ଦୁଃଖ ପରେ

ନାଇଁଦେଲି ଲାଜର ଗହଣା

କଣ୍ଟକିତ ଜୀବନ ରାସ୍ତାକୁ

କଲି ଫୁଲର ଅଗଣା

ଆଜି ମୁଁ ପ୍ରେୟସୀ ଖାଲି

ତୁମ ଅଭିସାରିକା ସାଜି

ତୁମେ ତ ଆସିବ ନାହିଁ

ଆସୁ ପଛେ ତୁମ ପ୍ରତିଛବି