ଅଭିନୟ

ମିଛ ରଙ୍ଗମଞ୍ଚେ କଳାକାରମାନେ

ନାନା ଭୂମିକା ନିଭାନ୍ତି,

ଦର୍ଶକ ପ୍ରାଣରେ ହରଷ ବିଷାଦ

ଅଭିନୟରେ ଭରନ୍ତି,

ବିହ୍ୱଳିତ କରି ପ୍ରାଣ,

କ୍ଷଣିକ ଆନନ୍ଦ, ଦୁଃଖ ମିଶ୍ରିତରେ

ଅଥୟ ହୁଅଇ ମନ ।

ସତ ରଙ୍ଗମଞ୍ଚେ ପ୍ରତ୍ୟେକ ମଣିଷ

ଜଣେ ଜଣେ ଅଭିନେତା,

ନିଜ ଭୂମିକାରେ ଅବତୀର୍ଣ୍ଣେ ସର୍ବେ

କରନ୍ତି ସଫଳ ଚିନ୍ତା,

ବାଛିଣ ନିଜସ୍ୱ ପନ୍ଥା,

ଯଥାଯୋଗ୍ୟ କର୍ମ ନିଭାଉଥାଆନ୍ତି

ନିଜକୁ ଭାବି ବିଜେତା ।

ଏ ରଙ୍ଗମଞ୍ଚରେ ଯେଉଁ ଭୂମିକାରେ

ଯିଏ ହୁଅ ଅବତୀର୍ଣ୍ଣ,

ମିଛ ରଙ୍ଗମଞ୍ଚ ଅନୁକରଣରେ

ଜୀବନକୁ କର ଧନ୍ୟ,

ମନ୍ଦ ବୁଦ୍ଧି ହଟାଇଣ,

ପରସ୍ପରେ ସ୍ନେହ, ପ୍ରୀତି, ମୈତ୍ରୀ ବାଣ୍ଟି

ବଢାଅ ନିଜ ସମ୍ମାନ ।

ଅଭିନୟ ତୁମ ସାର୍ଥକ ହୋଇବ

ସୁଗୁଣକୁ ଆଚରିଲେ,

ମନରୁ କଳୁଷ କାଳିମା ଦୂରେଇ

ହୃଦୁ ହୃଦ ଛନ୍ଦି ଦେଲେ,

ଫିଟିଯିବ ଭବ ବନ୍ଧ,

ଜନମ ସାର୍ଥକ ଭବ ରଙ୍ଗମଞ୍ଚେ

ନଥିବ କିଛି ପ୍ରମାଦ ।