ଅଭିମାନିନୀ ଶୀତରାଣୀ
ଅଭିମାନିନୀ ଶୀତରାଣୀ
ପୂର୍ବାଶା ଲଲାଟେ ଆସିଗଲେ ରବି
ଧାରଣୀର ବୁକୁ ଛୁଇଁ
ପଉଷ ପ୍ରତ୍ୟୁଷେ ଶୀତରାଣୀ ସେତ
ଅଭିମାନେ ଯାଏ ଧାଇଁ l
ଉଷ୍ମତା ଉହାଡ଼େ କାହିଁ ଲୁଚିଯାଏ
କାଲୁଆ ବାଆର ସ୍ପର୍ଶ
କୁହୁଡ଼ି କାକର ଘେରା ଉପବନେ
ଖେଳିଯାଏ ରଙ୍ଗ ଚିତ୍ର l
ଅନ୍ଧକାର ସାଥେ ଆଳସ୍ୟ ଆଳାପ
ଘୁଞ୍ଚି ଘୁଞ୍ଚି ଯାଏ ଦୂରେ
କର୍ମଠ କରାଏ ମାନବ ଶରୀର
ସତେଜ ସଂଭ୍ରମ ସ୍ଵରେ l
ପଶମ ପ୍ରସ୍ତୁତ ଶୀତବାସ ସଙ୍ଗେ
ଭଳି ଭଳି ଆଭରଣ
ମାଘର ବାଘୁଆ ଶୀତ ଫେରିଯାଏ
ଆସେ ଫୁଲେଇ ଫଗୁଣ l
ଅଭାବୀ ସଂସାରେ ଅଭିମାନୀ ଶୀତ
ଗାଏ ବୀରହର ଗୀତ
ଲାଜ ଲୁଚିବାକୁ ଲୁଗାର ଅଭାବ
ତା ସଙ୍ଗେ କି ହେବ ମିତ l
ଋତୁ ବଦଳିଲେ ଧରା ଉପବନେ
ଚୋରା ଚଇତାଳି ବହେ
ଶୀତରାଣୀ ଗାଏ ବେସୁରା ରାଗିଣୀ
ଅଭିମାନୀ ଲୁହ କହେ l
ମେଲାଣି ନେଇ ସେ ଚାଲିଯାଏ ଧୀରେ
ଫେରିବାର କଥା ଦେଇ
କଲେ କରୁ ପଛେ ମାନ ଅଭିମାନ
ଶୀତର ତୁଳନା ନାହିଁ l