ଅଭେଦ୍ୟ ସ୍ମିତହାସ୍ୟ

କେଶବ !

ଏ ଧର୍ମ ଯୁଦ୍ଧ

କାହା ପାଇଁ

ତୁମ ଶସ୍ତ୍ର କଣ

ସତରେ ଶାଣିତ ?

ତେବେ କାହିଁକି 

ତୁମ ସୁଦର୍ଶନ

ସ୍ତବ୍ଧ ,ନିରୁପାୟ

କୁନ୍ଦୁଲିର ଯନ୍ତ୍ରଣାରେ

ନିର୍ଭୟାର ବିବଶତାରେ !

କେଶବ !

ଇତସ୍ତତଃ ତୁମ ଉପସ୍ଥିତି

ଦରବାରୀ,ଦରଜା

ପୂର୍ବାହ୍ନ, ସାୟାହ୍ନ

ପ୍ରତି ଅଣୁକୋଣରେ

ତେବେ କାହିଁକି

ବୟସର ଅପରାହ୍ନରେ

ଆଜି ଜରାଜୀର୍ଣ୍ଣ ମାନବିକତା

ଜନ୍ମପିଣ୍ଡ ଯାଇ ନର୍ଦ୍ଦମାରେ !

କେଶବ !

ତୁମ ସ୍ମିତହାସ୍ୟ

କାହାପାଇଁ 

କ୍ରିଷ୍ଣା ଇଣ୍ଡଷ୍ଟ୍ରୀରେ

ଜଳି ପାଉଁଶ ହୋଇଥିବା 

ନନ୍ଦ ପାଇଁ ?

ନା ବସ୍ତିରେ ଥିବା

ବାପ ଛେଉଣ୍ଡ 

ଶ୍ରବଣ କୁମାର ପାଇଁ

ନା ନା

ବୋଧେ ସ୍ୱାମୀ ହନ୍ତା

ସାବିତ୍ରୀ ପାଇଁ !

କେଶବ !

ତୁମ ଛଳନା

କାହା ପାଇଁ 

ପ୍ରେମରେ ଧୋକା

ଖାଇ ଅନ୍ତସତା

ରାଧା ପାଇଁ 

ନା ଶୁଷ୍କ ଜମିର

ତୃଷ୍ଣା କୁ ସହିନପାରି

ବିଷ ପିଇ ଥିବା

ଅର୍ଜୁନ ପାଇଁ 

କଣ ସତରେ ତୁମେ

ନିରୁପାୟ ?

କେଶବ !

ତୁମ ଶସ୍ତ୍ର କଣ 

ହଜିଯାଇଛି ?

ତୁମ ବଇଁଶୀ 

କଣ ବେସୁରା

ହୋଇଗଲାଣି 

କେଶବ !

କେଶବ ତୁମେ ହାରିଯାଇଛ

ତୁମ ସ୍ମିତହାସ୍ୟ ଅଭେଦ୍ୟ 

ଏ ଧର୍ମ ଯୁଦ୍ଧରେ ।