Library
ଅଭାବୀ ସଂସାରେ ଶ୍ରାବଣ ରାତି
ଅଭାବୀ ସଂସାରେ ଶ୍ରାବଣ ରାତି
ଅଭୁଲା ଅଲିଭା ଏ ଶ୍ରାବଣ ରାତି
ଆଖିରେ ମୋ ଲୁହ ଝର,
କୋଳରେ ମୋହର ଉପାସିଆ ପିଲା
ଖୋଜୁଛି ଟିକେ ଆହାର ।
ଘରର ଛାତରୁ ଝରୁଅଛି ପାଣି
ନଡା ଯାଇଅଛି ଉଡି,
ଘରେ ଝରେ ବର୍ଷା ଟପ୍ ଟପ୍ ହୋଇ
ସବୁ ଯାଏ ତିନ୍ତି ବୁଡି ।
ବାହାରେ ଶୁଭଇ ସୁ ସୁ ଶବ୍ଦ
ପବନର ବଢେ ଗତି,
ଚାଳ ଖଣ୍ଡ ମୋର କେବେ ଉଡିଯିବ
ଲାଗୁଥାଏ ବଡ଼ ଭୀତି ।
ଇନ୍ଦିରା ଆବାସ ମିଳିନି ଆମକୁ
ଅଛି ବୋଲି ଖଣ୍ଡେ ଜମି,
ଟାଙ୍ଗରା ଜମି ଟି ପଡିଥାଏ ଖାଲି
ଫସଲ ଜମା ହୁଏନି l
ବାହାରେ କୁକୁର ବିଲୁଆଙ୍କ ରଡି
ଶୁଭିଯାଏ ବାରବାର,
କୁନି ପିଲା ମୋର ଡରରେ ଛାନିଆ
ଲୁଚାଏ ମୁହଁକୁ ତାର ।
ନାହିଁ ଘରେ ଖାଦ୍ୟ ରୋଗିଣା ସ୍ୱାମୀ ମୋ
ଯାଇନି କାମକୁ ସେହି,
ଘରେ ଯାହାଥିଲା ପଇସା ପତର
ଯାଇଛି ସେ ଶେଷ ହୋଇ ।
ଚୁଲି ଠାରୁ ଜାଳ ସବୁ ଓଦା ହେଲା
କେମିତି ରୋଷେଇ ହେବ,
ଅଭାବୀ ଘରକୁ ଶ୍ରାବଣ ରାତି
ଦହଗଞ୍ଜ କରୁଥିବ ।
ଶୋଇବି ହୁଏନି ବସିବି ହୁଏନି
ଘର ସାରା ଓଦା ଲାଗେ,
ଶ୍ରାବଣ ରାତିଟି ବେଗେ ପାହିଯାଉ
ପ୍ରଭୁଙ୍କୁ ଏତିକି ମାଗେ ।
ରାତି ପାହିଗଲେ କାମ କରିଯିବୁ
ଆମେ ତ ନିତି ମୂଲିଆ,
ଜୀବନ ଆମର ଦୁଃଖରେ ଭରା
ଏକା ଭଗବାନ ସାହା।
