ଆସୁଛି ସୁଦିନ

ଆସୁଛି ସୁଦିନ , ହସିବା ସେଦିନ

ମଧୁର ମୁହୂର୍ତ୍ତ ହୋଇବେ ସାଥୀ

ଭଲ ମଣିଷର ଭାବନା ହିଁ ଭଲ

ହେ ବନ୍ଧୁ ! ଗାଇବା ପ୍ରୀତିର ଗୀତି ।

ଦେଖିଛି ତୁମରି ନରମ ଆଖିରେ

ବହଳ ବହଳ ଭିନ୍ନ କାହାଣୀ

କାହାଣୀ ନୁହେଁ ତ , ଅଭୁଲା ଅତୀତ

ତମସାତୀର୍ଥରେ ଭରା ଉଜାଣି ।

ସବୁ କଥା କ'ଣ କହିଥାଏ ଓଠ ,

ଅକୁହା ଭାଷାର ଅବ୍ୟକ୍ତ ରୂପ

ସନ୍ତର୍ପଣତାରେ ନୀରବିଯାଏ ସେ

ଅସହ୍ୟ ତା' ପାଇଁ କାଳ-ବିଦ୍ରୁପ ।

ଅନୁଭବିଛି ମୁଁ ତୁମ ହୃଦୟର

ଅବ୍ୟକ୍ତ ଅସହ୍ୟ ନିର୍ବାକ୍ ପଣ

ଶବ୍ଦମାନେ ତୁମ ଆଙ୍କି ଦେଇଛନ୍ତି

ମୋ' ହୃଦୟେ ତୁମ ସ୍ଥାଣୁ ଚିତ୍ରଣ ।

ଅଟ୍ଟାଳିକା,ଅବା କୁବେର ସମ୍ପତ୍ତି

ପ୍ରକୃତ ଧନର ମୋହର ନୁହେଁ

ତୁମରି ମନର ସୋପାନ-ସାରଲ୍ୟ 

ତୁମେ ମହାଧନୀ, ଇଙ୍ଗିତେ କୁହେ ।

ଦୁନିଆ ବିଚିତ୍ର ,ଅଦ୍ଭୁତ ତା' ଚିତ୍ର

ଅସମ୍ଭବ ବୋଲି ଜାତକେ ନାହିଁ

ଉଚ୍ଚାକାଂକ୍ଷୀ ପାଇଁ ଉଚ୍ଚାସନ ଥାଏ

ନୀଚପ୍ରୀତି ପାଇଁ ମହତ୍ତ୍ୱ କାହିଁ ।

ହସିବା ପାଇଁ ତ ସମସ୍ତେ ଅଛନ୍ତି

ହସ ବାଣ୍ଟିବାକୁ ନିଅଣ୍ଟ ମନ

ଅନ୍ୟକୁ ହସାଇ ସାଉଁଟି ପାରିଲେ

ସେ ହସରେ ମିଳେ ଅମୂଲ୍ୟ ଧନ ।

ଆଜିର ବଜାରେ କିଏ ବା ପଚାରେ

ଭଲ ମଣିଷର ମାନବିକତା

ତଥାପି କେତେକ ଅଛନ୍ତି ନିଶ୍ଚୟ

ମଣିଷ ପାଇଁକି କରନ୍ତି ଚିନ୍ତା ।