ଆସୁଛି କାଳିଆ ସୁନା
ଆସୁଛି କାଳିଆ ସୁନା
କଳା ମେଘ ପରି ଦେଖ ଲୋ
ଆସୁଅଛି କାଳିଆ
ମନ କଥା ସବୁ ବୁଝେ ଲୋ
ଗିରିବର ତୋଳିଆ ।
ନନ୍ଦର ନନ୍ଦନ ସୁନ୍ଦର
କୋଟି କନ୍ଦର୍ପ ରୂପ
ଚୋରି କରିନିଏ ମନ ଲୋ
ଚାରୁ ଚାନ୍ଦ ଶ୍ରୀମୁଖ ।
ହାତ ପାଦ ନାହିଁ ଦେଖ ଲୋ
ଚଢେ ନନ୍ଦିଘୋଷରେ
କୋଟି ଭକତଙ୍କୁ ନଚାଏ
ଘଣ୍ଟ -ଘଣ୍ଟାର ସୁରେ ।
ଶ୍ରୀକ୍ଷେତ୍ର ପଡୁଛି ଉଛୁଳି
ଆସେ କଳା ବାମନ
ଭାଇ ଭଉଣୀଙ୍କ ସଙ୍ଗତେ
ବୁଲି ଯିବ ମୋ ଧନ ।
ନନ୍ଦିଘୋଷ ଅଛି ପ୍ରସ୍ତୁତ
ଡାକେ, ଆସ ହେ ପ୍ରଭୁ
ବିରାଜ, ଆଜ ମୋ ଉପରେ
ଝରୁ କରୁଣା ସିନ୍ଧୁ ।
ଶୁକ ଦୁଇ ଜୀବ-ପରମ
ଗାଏ ଆତ୍ମା ସଂଗୀତ
ଡ଼ାହୁକ ଦେଲାଣି ଡ଼ାକରା
ଆସ ଆସ ଭକତ ।
ଆଜି ପରା ରଥ ଯାତରା
ହସେ କାଳିଆ ସୁନା
ଆତ୍ମା ବଡ଼ଦାଣ୍ଡେ ନାଚଇ
ମୋର ମନ ମଇନା ।
ହସୁଥା' କାଳିଆ ଏମିତି
ଦିଶୁ ଶ୍ରୀମୁଖ ତୋରା
କଳା ରଂଗ ଉଠୁ ଝଟକି
ଝରୁ ଆଶିଷ ଧାରା ।