ଆସିଛି ପଉଷ

            ଶେଯ ଛାଡିବାକୁ ହେଉନାହିଁ ମନ

                    କାଉ ରାବିଲାଣି କାଆ

            କଅଁଳ ଖରାରେ ଆସିଛି ପଉଷ

                    ବହେ ସୁଲୁସୁଲୁ ବାଆ ।

            ଗଛପତରରୁ ମୁକୁତା ପରିକା

                    ଶିଶିର ପଡୁଛି ଝରି

            ଲାଗୁଛି ହେମାଳ ଶୀତଲୁଗା ଥାଇ

                    ଦେହ ଯାଉଅଛି ଥରି ।

            ଘେରି ରହିଥିବା ଘନ କୁହୁଡିରେ

                    ଦିଶୁନାହିଁ ଦୂର ବାଟ

            ଭିଡ ଜମୁନାହିଁ ନୂଆ ବୋହୂଙ୍କର

                    ଖାଆଁ ଖାଆଁ ନଈ ଘାଟ ।

            ଖରା ଖୋଜି ଖୋଜି ବୁଢ଼ା ବୁଢ଼ୀ ଯେତେ

                    ବାହାରେ ବସନ୍ତି ଆସି

            ଧାନ କାଟିବାକୁ ତରତର ହୋଇ

                    ବିଲ ଆଡେ ଧାଏଁ ଚାଷୀ ।

            ବଗିଚା ସୁନ୍ଦର ଗେଣ୍ଡୁ ଗୋଲାପରେ

                    ହସୁଛନ୍ତି ସବୁ ଫୁଟି

            ବରଷକ ପରେ ପିଲେ ପାଇଛନ୍ତି

                    ଧାନ କଟାକଟି ଛୁଟି ।

            ଧାନ କିଆରୀଟି ହଳଦୀ ହଳଦୀ

                    ଦେଖିବାକୁ ମନଲୋଭା

            ଉଡି ବୁଲୁଥାନ୍ତି କଜଳପାତିଏ 

                    ବଢାଇ ତାହାର ଶୋଭା ।

            ଆଳୁ ବାଇଗଣ କୋବି ମୂଳା ଆଦି

                    ପନିପରିବାର ଚାଷ

            ଚଷା ପୁଅ ଏବେ କରିବ ହରଷେ

                     ଲାଗିପଡି ସାରା ମାସ । 

            ଶଗଡ଼ରେ ବସି ଧାନ କଳେଇରେ

                     ଖଳାକୁ ଆସିବେ ମାଆ

            ସୋରିଷ କ୍ଷେତର ମିଠା ଗୀତ ଏବେ

                     ଶୁଣିବ ଆମରି ଗାଆଁ ।