ଆସିବ କି ସତ୍ୟଯୁଗ

କଳ୍କୀ ଆସିଛି କି କୋରନା ରୂପରେ

   ଧରାଧାମେ ଅବତରୀ ।

ଅଦୃଶ୍ୟ ରୂପରେ ବାର ହାତ ଖଣ୍ଡା

  ବୁଲେ ତା'ର ହାତେ ଧରି ।୧।

ତ୍ରେତୟା ଦ୍ୱାପରେ ଜନମ ଲଭିଲେ

   ମାନବ ଶରୀରେ ହରି ।

ଦୁଷ୍ଟ ନିବାରିଲେ ଶିଷ୍ଟ ରକ୍ଷା କଲେ

   ପାପକୁ ବିନାଶ କରି ।୨।

 ମାଳିକା ବର୍ଣ୍ଣିତ କଳ୍କୀ ଅବତାର

   କଳିଯୁଗ ଶେଷ ପାଇଁ ।

ମାତା କି ପେଷିଲେ କୋରନା ଦୂତକୁ

  ସୂଚନା ତାଙ୍କର ଦେଇ ।୩।

 ସୃଷ୍ଟି ବିନାଶର ପ୍ରଳୟ ପୂର୍ବରୁ 

    ସତର୍କ କରିବା ପାଇଁ ।

ବେଳ ଥାଉ ଥାଉ ସତର୍କ ହୋଇଲେ

  ସୃଷ୍ଟି ଯିବ ରକ୍ଷା ହୋଇ ।୪।

କୋରନା ତାଣ୍ଡବ ମାନବ ଦମନେ

    ପରିବର୍ତ୍ତନର ଘଣ୍ଟି ।

ଜାଗ୍ରତ ହେଇଛି ବିଶ୍ୱରେ ମାନବ

   ସମ୍ଭୋଗ ନିଦ୍ରାରୁ ଉଠି ।୫।

ପ୍ରତ୍ୟକ୍ଷ କୋରନା ମାନବ ଶିକାରେ

   ଶାନ୍ତ ପ୍ରକୃତିର ରୋଷ ।

ପରୋକ୍ଷରେ ଦୂର ବିଷାକ୍ତ ଭାବନା

  ଶାନ୍ତ ହୁଏ ପରିବେଶ ।୬।

କୃତ କର୍ମ ପାଇଁ ପ୍ରକୃତିର ରାୟ

    ମାନବକୁ ଗୃହ ବନ୍ଦୀ ।

ଅପ୍ରିୟ ସତ୍ୟକୁ ଉନ୍ମୋଚନ କରେ

   ପାପିଙ୍କୁ ମୃତ୍ୟୁରେ ଦଣ୍ଡି ।୭।

ବିଚାର ପ୍ରକ୍ରିୟା ସୃଷ୍ଟି ଅଦାଲତେ

    ପ୍ରକୃତି  ବିଚାରପତି ।

ବାତାବରଣରେ ନୂଆ ଉନ୍ମାଦନା

   ଫେରୁଅଛି ସୁଖ ଶାନ୍ତି ।୮।

ଜଳ ସ୍ଥଳ ବାୟୁ ପ୍ରଦୂଷଣ ହ୍ରାସ

   ନଦୀ ନାଳ ସ୍ୱଚ୍ଛ ଦିଶେ ।

ନିର୍ମଳ ଗଗନେ ସ୍ୱଚ୍ଛ ସମୀରଣ

   ସ୍ଥାବର ଜଙ୍ଗମ ହସେ ।୯।

ମୃତ୍ୟୁ ବିଭୀଷିକା ନିକଟରୁ ଦେଖି

   ଇର୍ଷା ହିଂସା ଅହଙ୍କାର ।

ଲୋଭ ମୋହ ମାୟା ବିଳାସ ବ୍ୟସନ

  ଧୀରେ ଧୀରେ ହୁଏ ଦୂର ।୧୦।

ଅଧ୍ୟାତ୍ମ ଚେତନା ଆଲୋକ ରଶ୍ମିରେ

  ନାଶ ହୋଇ ରୋଗ ଭୋଗ ।

ଆଶା ଅଙ୍କୁରିତ ନିରାଶା ମନରେ

  ଆସୁଛି କି ସତ୍ୟଯୁଗ ??୧୧