ଆସ ପାଳିବା ରଜ

ଆକାଶେ ଦେଖ ଉଡ଼ଇ ଗୁଡ଼ି

ଗଛରେ ଝୁଲେ ଦୋଳି

ରଜ ଆସିଛି ଖୁସି ମନରେ

ଆସ ପାଳିବା ମିଳି ।

ପୋଡ଼ପିଠାର ସୁବାସେ ପରା

ମହକେ ସବୁ ଘର

ସବୁରି ଓଠେ ଫୁଟଇ ହସ

ଦୁଃଖକୁ କରି ଦୂର ।

ବାଜାର ତାଳେ ଗାଁ ଗଣ୍ଡାରେ

ହୁଏ କବାଡ଼ି ଖେଳ

ଲୁଡ଼ୁ ତାଆସ ଖେଳରେ ଜମା

ଜାଣି ପଡ଼େନି ବେଳ ।

ପିଲାଠୁ ବୁଢ଼ା ନୂଆ ପୋଷାକ

ରଜେ ପିନ୍ଧନ୍ତି ପରା

ରଜରେ ଆମ ପରି ଖୁସିରେ

ଫୁଲି ଉଠଇ ଧରା ।

ଲୁଗା ଦୋକାନ ଫଳ ଦୋକାନ

ରଜରେ ଭିଡ଼ ହୁଏ

ରଜପରବେ ଝିଅ ଘରକୁ

ରଜଭାର ଯେ ଯାଏ ।

ରଜରେ ଚାଲ ନୂଆଜାଗାକୁ

ଯିବାରେ ସାଙ୍ଗ ବୁଲି

ତିନି ଦିନର ରଜ ପରବ

ହୁଏନି ପାରି ଭୁଲି ।