ଆସ ମାଆ ଭବାନୀ
ଆସ ମାଆ ଭବାନୀ
ଆସ ମାଆ ଭବାନୀ ସିଂହବାହିନୀ,
ମନ୍ଦାର ପୁଷ୍ପେ ମଣ୍ଡନୀ,
କରୁଛୁ ସ୍ୱାଗତ ମହିଷା ମର୍ଦ୍ଦିନୀ,
ଚଣ୍ଡ ମୁଣ୍ଡ ବିନାସିନୀ ॥
ପାପେ ଭାରାକ୍ରାନ୍ତ ହେଲାଣି ମେଦିନୀ,
ସାଧୁସନ୍ଥ ଡରିଲେଣି,
ଅସଂଖ୍ୟ ମହିଷା ଚଣ୍ଡମୁଣ୍ଡ ଜନ୍ମି,
ଆତଙ୍କ ଖେଳାଇଲେଣି ॥
ଜଳ ସ୍ଥଳ ବାୟୁ ସବୁ ପ୍ରଦୂଷିତ,
ଖାଦ୍ୟେ ଅପମିଶ୍ର ପୁଣି,
ମଣିଷ ପଣିଆ ହଜି ହଜି ଯାଏ,
ଆସିଲେ ପାରିବ ଜାଣି ॥
ଶିକ୍ଷା ସ୍ୱାସ୍ଥ୍ୟ କ୍ଷେତ୍ରେ ଘୋର ଅବ୍ୟବସ୍ଥା,
ହେ ମା' ଜଗତ ଜନନୀ,
ସେବା ଅର୍ଥକାରୀ ଔଷଧ ଭେଜାଲ୍,
ରୋଗେ ହନ୍ତସନ୍ତ ପ୍ରାଣୀ ॥
ଜାତିବାଦ ପ୍ରଥା ସଂରକ୍ଷଣ ବ୍ୟାଧି,
ଉଗ୍ରରୂପ ଧରିଲାଣି,
ବ୍ୟାଙ୍କଧନ ଲୁଟି ଦେଶରୁ ତସ୍କର,
ଦେଶାନ୍ତର ଗମିଲେଣି ॥
ବେକାରୀ ସମସ୍ୟା ଦରଦାମ୍ ବୃଦ୍ଧି,
ଅଣ ଆୟତ ହେଲାଣି,
ରାଜନୀତି ହିଂସା ଦଳୀୟ କନ୍ଦଳେ,
ଗଣତନ୍ତ୍ର ହଜିଲାଣି ॥
କେତେ ଭଣ୍ଡବାବା ଯୌନବ୍ୟାଭିଚାରେ,
କାରାଗାରେ ପଶିଲେଣି,
ସତ୍ୟର ଉପରେ ଅସତ୍ୟର ଏବେ,
ପ୍ରାଦୁର୍ଭାବ ବଢିଲାଣି ॥
ମଦର ବନ୍ୟାରେ ଭାସନ୍ତି ମଦ୍ୟପ,
ମଦ ଲାଗି ବୁଡେ ଭେଳା,
ନାନା ଅଘଟଣ ରାସ୍ତା ଦୁର୍ଘଟଣା,
ସମାଜରେ ବିଶୃଙ୍ଖଳା ॥
ବୃଦ୍ଧ ପିତାମାତା ହୁଅନ୍ତି ହିନସ୍ତା,
ସେବାରୁ ବଞ୍ଚିତ ହୋଇ,
ଆଶ୍ରୟ ଲୋଡନ୍ତି ଜରାନିବାସରେ,
କର୍ମକୁ ଆଦରି ନେଇ ॥
କୋଟି ପ୍ରଣିପାତ ଜଗତ ଜନନୀ,
ଦୁଷ୍ଟ ବିନାଶିନୀ ମାଆ,
ହଟାଇ ତମସା ଦେଇ ଜ୍ଞାନାଲୋକ,
ବିପଦେ ହୁଅ ମାଆ ସାହା ॥
(ସଦାନନ୍ଦ ପ୍ରତିହାରୀ)
ତା୨୮-୦୯-୨୦୧୮