ଆସ ଖେଳିବା ମିଳି

ଆସରେ ପିଲେ ପାଖକୁ ଆସ

ଖେଳିବା ଆମେ ମିଳି 

ନାଚିବା ଆମେ ଗାଇବା ଆମେ

ଗୀତ ଭଳିକି ଭଳି ।

ସବୁରି ମୁଖେ ଥିବରେ ହସ

ଦୁଃଖ ଯେ କରି ଦୂର

ଛନ୍ଦ କପଟ ନଥିବ ମନେ

ସଭିଏଁ ଆପଣାର ।

ହାରିବା ଆଉ ଜିତିବା ପରା

ଖେଳେ ରହିଛି ଲାଗି

ହାରିବା ପରା ସଫଳତାର

ପ୍ରମୁଖ ଚାବି କାଠି ।

ଆଜି ଜୀବନ କାଲିକି ନାହିଁ

କଳି ଯେ କିଆଁ କରୁ

ଆନନ୍ଦ ମିଳେ ସାଙ୍ଗଟି ଯେବେ

ହସି ଦିଅଇ ଦୂରୁ ।

ଗୋଟେ ଜିନିଷ ଭାଙ୍ଗିଲେ ଭାଇ

ଯୋଡ଼ି ହୁଏନି ପରେ

ବନ୍ଧୁତା ଠାରୁ ବଡ଼ ଜିନିଷ

ନାହିଁ କିଛି ସଂସାରେ ।

ଚାହାଁନ୍ତି ଯଦି ଖେଳିବା ପାଇଁ

ସାନ ଭାଇ ଭଉଣୀ

ଆମ ସାଥିରେ ଖେଳିବା ପାଇଁ

ଉତ୍ସାହ ଦେବା ପୁଣି ।

ପ୍ରେରଣା ଆଉ ଉତ୍ସାହ ପରା

ମନରେ ଦିଏ ବଳ

ଆମକୁ ଦେଖି ପିଲାଏ ଶିଖି

ହୁଅନ୍ତି ଗତିଶୀଳ ।

ଖେଳ ବେଳରେ ଖେଳିବା ଖେଳ

ପଢ଼ା ସମୟେ ପଢ଼ା

ସଜାଡ଼ି ରଖ ଜିନିଷ, କର

ଗୁରୁଜନଙ୍କ ସେବା ।

ଯେଉଁ କାମକୁ କରୁଛ ପିଲେ

ଆଗ୍ରହର ସହ କର

ଆଗ୍ରହ ସହ କାମ କରିଲେ

ଲକ୍ଷ୍ୟ ହେବ ସାକାର ।