ଆସ ବୋଳିହେବା ପ୍ରୀତିର ଚନ୍ଦନ

ହେ ସମୟ ତୁମେ   ଆନନ୍ଦ ସ୍ୱରୂପ

     ଜୀବନ ନିତ୍ୟ ନୂତନ

କୁଣ୍ଠିତ ସମସ୍ୟା    ବାଧା ବନ୍ଧନର

     ତୁମେ ମୂଳ ସମାଧାନ ।

ସରଳ ସୁନ୍ଦର   ତୁମେ ସାବଲୀଳ

     ହୁଅ ଯଦି ଅନୁକୂଳ

ହୁଏ ଗତିଶୀଳ    ସ୍ୱଚ୍ଛନ୍ଦ ଜୀବନ

    ଭାଗ୍ୟ କଲ୍ୟାଣ ମଙ୍ଗଳ ।

ସ୍ନେହ ମମତାର   ଅମୃତ ନିର୍ଝର

    ସମୟ ଅଭୁଲା ପୃଷ୍ଠା

ଭରିଦେଉ ପ୍ରାଣେ   ନୂତନ ଆଲୋକ

    କିରଣ ନୂତନ ଆଶା ।

ଜନନୀ ଭଗିନୀ   ଜାୟା ସୁରକ୍ଷିତ

     ପ୍ରାକୃତିକ ସବୁଜିମା

ସଦା ପଲ୍ଲବିତ    ହେଉ ସୁରଭିତ

     ଜାଗୁ ଶୁଭ ସଙ୍କଳ୍ପନା ।

ପ୍ରତି ଦ୍ୱାର ପୁରେ   ମାନବ ସମାଜେ

      ସୁଖଶାନ୍ତି ସଦ୍ଭାବନା

ସଞ୍ଚରୁ ସନ୍ଦେଶ  ଆହ୍ୱାନେ ସମୟ

     ନବବର୍ଷ ସୁକାମନା ।

ଆସ ବୋଳିହେବା  ପ୍ରୀତିର ଚନ୍ଦନ

     ଆମେ ଅମୃତ ସନ୍ତାନ

ସମ ତାନ ସ୍ୱନେ   ଜୀବନ ସଙ୍ଗୀତ

     କରିବା ସମୂହ ଗାନ ।