ଆମରି କରମା ପୂଜା

ତିନୋଟି ବାଉଁଶ ଯୋଡ଼ିଦେ ସଜନୀ 

ମଝିରେ କରମା ଡାଳ,

ନିଷ୍ଠା ଭକତିରେ ପୂଜିବା ମାତାକୁ 

ସେ ଯେ ଗ୍ରାମଦେବୀ ଶାଳ ।

ରୋଗ ଶୋକ ସବୁ ହୁଏ ଦୂରୀଭୂତ 

ମାଆର କରୁଣା ହେଲେ,

ଫସଲରେ ଜମା ଲାଗେନାହିଁ କୀଟ 

ଜନନୀ ଆଶିଷ ଥିଲେ ।

ହାତ ହାତ ଛନ୍ଦି ନାଚିବା ସଭିଏଁ 

ବାଜିଲା ମାଦଳ ବାଜା,

ବରଷକେ ଥରେ ଆସିଛି ପରବ

ଆମରି କରମା ପୂଜା ।

ମନାସି ରଖିଛି କଳାବୋଦା ଟିଏ 

ମାଆକୁ ଯାଚିବି ବୋଲି,

ଅରୁଆ ଚାଉଳ ଖଣ୍ଡ ହଳଦୀ କୁ 

ସିନ୍ଦୁର ମନ୍ଦାର ନାଲି ।

ଗଛରେ ରହିଛି ଉଭା ବନଦେବୀ 

ତା ପାଦେ ମୋହର ଭକ୍ତି,

ତହିଁରୁ ଜନ୍ମିଛି ହିନ୍ଦୁ ପରମ୍ପରା 

ଉପାସନା ଆଦିଶକ୍ତି ।