ଆମଘର କାମବାଲୀ

ନିତିନିତି ନୂଆ ପେଖନା ବାହାନା କାଢ଼େ ଆମ ଆମ କାମବାଲୀ,

ଆଜି କହିଗଲା-ଭିଣେଇ ଆସିଛି ଆସିବି ନାହିଁ ମୁଁ କାଲି ।

ମାଆର ଦେହଟା ଖରାପ ରହୁଛି ସକାଳୁ ଆସିବି ନାହିଁ,

ମୋ ବାପା କହିଛି-ଦିନ ଥାଉଁଥାଉଁ ଘରକୁ ଫେରିବି ମୁହିଁ ।

ରବିବାର ଦିନ ମୋ ଧରମ ଭାଇ ସପିଂ କରେଇ ନେବ,

ସବୁ ବୁଧବାର ମୋର ଉପବାସ ସେ ଦିନଟି ଛୁଟିଦେବ ।

କେତେଥର ତା'ର ଆଈ ମରିଲାଣି ନିଜେ ସେ ଯାଇଛି ଭୁଲି,

କେତେଥର ଜେଜେ ବେମାର ପଡୁଛି ଲାଗୁଛି ମାରେ ସେ ଗୁଲି ।

ବର୍ଷାଦିନ ପୁଣି ଟାଣଖରା ହେଲେ ଆସିହେଲା ନାହିଁ କହେ,

ଶୀତଦିନେ ହାତ-ପାଦ ଫାଟିଯିବ ଗ୍ଲୋବଟା ପିନ୍ଧିଥାଏ ।

ବ୍ରାଣ୍ଡେଡ଼ କମ୍ପାନୀ ଝାଡୁ ଆଣିଦିଅ ହାତକୁ କାଟିବ ନାହିଁ,

ବାସନ ମାଜିବା ମେସିନ ମିଳୁଛି ସେଥିରେ ପାରିବି ଧୋଇ ।

ସବୁଦିନ ଚାହାକରି ରଖିଥିବ ବିସ୍କୁଟ ହେଲେ ଚଳିବ,

ଫେରିଲା ବେଳକୁ ଯାହା ଖାଉଥିବ ସେହି ଜଳଖିଆ ଦେବ ।

ଅଲଗା କାମକୁ ଅଲଗା ପଇସା ଦରମା କାଟିବ ନାହିଁ,

ପାନରୁ ଟିକିଏ ଚୂନ ଖସିଗଲେ ଆକାଶକୁ ଥିବ ଚାହିଁ ।