ସିଧାକଥା-୧୦

ପୁରସ୍କାର ଦେବା ଫେସନ ହେଲାଣି ଯୋଗ୍ୟଲୋକ ପାଇଁ କାଳ,

ହାତୀପାଡ଼ ପରି ଶବଦ ତାହାର କାମକୁ କୁଷ୍ମାଣ୍ଡ ଫଳ ।

କେତେ ରଙ୍ଗ ପୁଣି ଢଙ୍ଗରେ ଯାଚନ୍ତି ପୁରସ୍କାର ଦେବାଲୋକ,

ପାଗଳ ପରାଏ ଧାଇଁଛନ୍ତି ଥୋକେ ସତେ ଦୀପାବଳି ପୋକ ।

କିଏ କହେ ଚାରି କପି ବହିଦେବ କିଏ ମାଗେ ବିବରଣୀ,

ଆଉ କିଏ କିଛି ଧନରାଶି ମାଗେ ଅଯୋଗ୍ୟ ଲେଖକ ଜାଣି ।

ଲେଖକ ବିଚରା ଘୋଡ଼ା ଆଗେ ନାଚେ ହାତରୁ ଖରଚ କରି,

ମାଗଣା ଖିଆଙ୍କୁ ବହି ଦେଉ ଦେଉ ସବୁବହି ଯାଏ ସରି ।

ପୁସ୍ତକ ମେଳାର ପୁରସ୍କାର ପାଇଁ ସଂଗୃହିତ ହୁଏ ବହି,

ହିସାବ କରିଲେ ତ'ର ମୂଲ୍ୟ କେତେ କେହି ପାରିବନି କହି ।

ପୁରସ୍କାର ଦାତା ଘର ଭରିଯାଏ ଦେଖାନ୍ତି ସେ ଅନୁଗ୍ରହ,

ଦୟାବାନ ଆଉ ପୁଣ୍ୟବାନ ଭାବେ ହୁଏ ତାଙ୍କ ପରିଚୟ ।

ରଙ୍ଗ ରଙ୍ଗିଆ ସେ ପ୍ରମାଣ ପତ୍ରଟି କିଛି କାମ ଦିଏନାହିଁ,

ସଭିଏଁ ଜାଣନ୍ତି ତଥାପି ବିକଳ ସେହି କାଗଜଟି ପାଇଁ ।