ଆମେ ସ୍ୱାଧୀନ -ଭାରତର ମୁହିଁ ନାଗରିକ

ବ୍ୟଙ୍ଗ କବିତା-

ଏ' ଦେଶ ମାଟିରେ ଜନମିଲି ବୋଲି ଭାରତର ନାଗରିକ, 

ଓଡ଼ିଶା ରାଜ୍ୟର ଭାଷା ମୁଁ କହୁଛି ତେଣୁ ମୁଁ ଓଡ଼ିଆ ଲୋକ |

ବାପାଙ୍କ ସଂପତ୍ତି ମାଆର ମମତା ସବୁଥିରେ ଅଧିକାର, 

ପାଠ ପଢିବାକୁ ବଞ୍ଚି ରହିବାକୁ ସହାୟକ ସରକାର |

ଚାକିରୀ ଖଣ୍ଡିଏ ପାଇ ମୁଁ ଭାବୁଛି ଖଣ୍ଡା ଏବେ ହାତେ ମୋର,

ବେପାରୀ ହେବାରୁ ଭାବେ ଦୟାକରେ ଗ୍ରାହକ ଯେତେ ଚାକର |

ନେତା ହେଇଗଲି ଭାବୁଛି ନିଜକୁ ଏ' ଦେଶ ମାଲିକ ମୁହିଁ,

ଶ୍ରମିକ ହୋଇ ମୁଁ କହୁଛି ମୋ ବିନା କିଛି ବି ହୋଇବ ନାହିଁ |

କୃଷକ ହୋଇଛି ଜମିକୁ ଯିବିନି କରିବିନି ଆଉ ଚାଷ,

ଆଦିବାସୀ କୁଳେ ଜନମିଛି ମୁହିଁ ଖାଇବାକୁ ମଦ ମାଂସ |

ଗରିବ ହେଇଛି ଭୋଟ ଦେଇଛି ସରକାର ସବୁଦେବ,

ଦେବିନାହିଁ କେବେ କାହାରିକୁ କିଛି ଥିଲେ ସିନା କିଏ ନେବ |