ଆମେରେ ଅମୃତ ସନ୍ତାନ

ମନୁର୍ଭବ ଆମେ ଉଦ୍ଭବ ଧରାରେ

ଅମୃତ ସନ୍ତାନ ସାଜି

ପିତା ପରମେଶ ଦେଇଛନ୍ତି ଚିତ୍ତେ

କେତେ ସଦ୍ଭାବକୁ ଖଞ୍ଜି ।୧।

ସ୍ନେହ ଦୟା କ୍ଷମା ସମତା ମମତା

ମୈତ୍ରୀ ଶାନ୍ତି ସୁହୃଦତା

ସୁଗୁଣ ଆବଳୀ ବଳେ ଉଜ୍ଜୀବିତ

ମହାର୍ଘ ମାନବିକତା ।୨।

ମାନବ ସେବା ହିଁ ମାଧବଙ୍କ ସେବା

ଏହା ଆମ ପୁଣ୍ୟବ୍ରତ

ଦୀନ ଦୁଃଖୀ ଜନ ପାଇଁ କାନ୍ଦେ ମନ

କରୁ ଶୋକ ଅଶ୍ରୁପାତ ।୩।

ଜଣ ପାଇଁ ନୁହେଁ ଗଣର ହିତରେ

ସମର୍ପିତ ଏ ଜୀବନ

ଦେଶ ଦଶ ରକ୍ଷା ଦୁର୍ନିବାର ଦୀକ୍ଷା

ଧାରୀ ଆମେ ଆଜୀବନ ।୪।

ଅମୃତ ସନ୍ତାନ ରୂପେ ଚିରନ୍ତନ

ଚିନ୍ତନରେ ଓତଃପ୍ରୋତ

ବିବିକ୍ତ ମରୁ ପ୍ରାନ୍ତରେ ବୁହାଇବୁ

ଦେବ ପ୍ରାଣର ପ୍ରପାତ ।୫।