ଲୋହିତ ଗୋଧୂଳି

ଦିବା ଅଭିନୟ ଶେଷରେ ବିଦାୟ

ଘେନି ସହସ୍ର ମୟୁଖ

ପ୍ରଚେତସ ମୁଖେ ପ୍ରୟାତ ବିମୁଖେ

ଗ୍ଲାନିରେ ଆରକ୍ତ ମୁଖ ।

ଗଗନ ପ୍ରାଙ୍ଗଣ ଲୋହିତ ବରଣ

ଆବରିଲା ଜଳ ସ୍ଥଳ

ବସୁନ୍ଧରା ଢାଳି ଅଂଶୁ ବସୁ ଧାରା

ପିନ୍ଧେ ଲୋହିତ ଦୁକୁଳ ।

ଦିବା ଅବସାନ ହବନରେ ବ୍ୟାସ

ଆସନେ ଆସୀନା ଉର୍ବୀ

ପ୍ରଦୋଷ ଅଙ୍ଗରେ କଲା ଜୀବନ୍ୟାସ

ଅର୍ପି ଅସ୍ତରାଗ ହବି ।

ଦିବସ ବିଲୟେ ବିହଗେ କୁଲାୟେ

ବାହୁଡ଼ିଲେ କଳରବେ

ଆଭୀର ଚାଳିତ ଗାଭୀ ନିମଜ୍ଜିତ

ନିଳୟ ବାହୁଡା଼ ପର୍ବେ ।

ଉଡ଼ିଲା ଗୋଧୂଳି ଗଢ଼ିଲା କୁଣ୍ଡଳୀ

ବ୍ୟାପିଲା ସଚରାଚର

ଆସନ୍ନ ରଜନୀ ଉଦରରେ ହେଲା

ତମସା ଗର୍ଭ ସଞ୍ଚାର ।