ଆମେ ସବୁ ଆଧୁନିକ

ମାଆ ଯଦି ମମିହେଇ ଭଲଲାଗେ କହିବାକୁ ଶୁଣିବାକୁ,

ମମିର ଅର୍ଥଟା ମଲାଲୋକ ହେଉ, ତମେ କିଏ କହିବାକୁ ?

ବାପା ଯଦି ଡାଡ଼ିହେଇ ଡେଡ଼ ହେଲା ଡିଡି ମାମ ହେଇଗଲେ,

ମଉସା କକେଇ ମାମୁକୁ ଅଙ୍କଲ କହିଲେ ସେ ଖୁସିହେଲେ ।

ଆମ ଭବିଷ୍ୟତ ବହୁତ ଉଜ୍ଜଳ ମାତୃଭାଷା ଗଲେ ହଜି,

ବଙ୍କା-ତେଡ଼ା ଭୁଲ ଇଂରାଜୀ ଚାଲିବ ତମେହେବ ସବୁ ପାଜି ।

ମୋ ପୁଅ ଓଡ଼ିଆ କହିଜାଣେ ନାହିଁ କହୁଛି ବଢିଆ ହିନ୍ଦୀ,

ଶୁଣିବା ଲୋକଟା ଗାଉଁଲିଆ ଭାବି ନିଜେ ହେଇଯିବ ଛନ୍ଦି ।

ଗରିବ ଶ୍ରମିକ ଗାଆଁ ମୂର୍ଖଲୋକ କହିବେ ଓଡ଼ିଆ କଥା,

ଆମେ ଇଂରେଜଙ୍କ ଉତ୍ତରାଧିକାରୀ ଟେକି ଚାଲୁଥିବୁ ମଥା ।

ଯେତେ ଛୋଟ ବସ୍ତ୍ର ପିନ୍ଧିବ ଝିଅଟା ସେତିକି ସୁନ୍ଦରୀ ହେବ,

ବୟଫ୍ରେଣ୍ଡ ଯଦି ନଥିବ ତାହାର ଗୋଠଖଣ୍ଡିଆ ହୋଇବ ।

ଆମେ ଆଧୁନିକ ବିଦେଶୀ ଚିଜକୁ କରୁ ବେଶି ବ୍ୟବହାର,

ତୁମର କି ଯାଏ କହିବୁ ହିଂରାଜି ଯୁଗ ହେଉଛି ଆମର ।