ମୋର୍ ନାଁ କମଳେନ୍ଦୁ

ଜାଣା କହେସିଁ ମୁଇଁ, ମୁହେଁ ମୁହେଁ କହେସିଁ

କିଏ ହଁସୁ କି କିଏ କାନ୍ଦଲେ କାନ୍ଦୁ

ମୋର୍ ନାଁ କମଳେନ୍ଦୁ ।

ମନ୍ ମୋର୍, ସବୁବେଲେ ସଫା ସୂତ୍ରା

ଦେହେ ମୋର୍ କହଁରୁ କି ଗନ୍ଧୁ

ମୋର୍ ନାଁ କମଳେନ୍ଦୁ ।

କିନ୍ଦରେଇ କରି କଥା ଟିକେ, କହି ନେଇଁ ଜାନେ ମୁଇଁ

ଯାହା କହେସିଁ ବିନ୍ଦୁ କେ ବିନ୍ଦୁ

ମୋର୍ ନାଁ କମଳେନ୍ଦୁ ।

ହେତିର୍ ଲାଗି ତ କେତେକୁଁ ଛାଡିଦେଲେ

ମୋର୍ କେତନେ କେତେ ବନ୍ଧୁ

ମୋର୍ ନାଁ କମଳେନ୍ଦୁ ।

ନେଇଁ କରେଁ ମୁଇଁ, ଭେଦ୍ ଭାବ୍ କେଭେ

କିଏ ମୁସଲିମ୍ କିଏ ହିନ୍ଦୁ

ମୋର୍ ନାଁ କମଳେନ୍ଦୁ ।

ପେଚାଖୁଟିଆ ଲୋକର୍ ସାଙ୍ଗେ, ଭାବ୍ ନେଇଁ ରଖେଁ ମୁଇଁ

ଚାଁଛି ଦେସିଁ ପୁରା ବୁନ୍ଧୁ

ମୋର୍ ନାଁ କମଳେନ୍ଦୁ ।

ଇ ଚାକରିନୁ ମୁଇଁ, ବେଶୀ କିଛି ତ ନେଇ କମେଇ

କମେଇଛେଁ ଖାଲି ମନ୍ ସରୋବରର୍ ଭରଷା ସିନ୍ଧୁ

ମୋର୍ ନାଁ କମଳେନ୍ଦୁ ।

ଯିଏ ମତେ ଚିନ୍ହି ନେଇ ପାର୍ଲା",ସେ ମୁନୁଷ୍ ତ ନେଇଁସେ

ହେଇଥିବା ଗୁଟେ ପର୍ଚ୍ଛା ବାନ୍ଦୁ

ମୋର୍ ନାଁ କମଳେନ୍ଦୁ ।