ହେ ଶୀତ

ହେମନ୍ତର ଅନ୍ତେ     ଶୀତ ଯେ ଆଗତେ 

      ନାନା ଅଳଙ୍କାର ନେଇ 

ରଙ୍ଗ ବେରଙ୍ଗର      ଫୁଲର ମହକେ 

      ମନେ ଆନନ୍ଦ ମିଳଇ ।

       

ପ୍ରାତରୁ ଟଗର       ସ୍ୱାଗତ ଜଣାଏ 

      ପୌଷ ଓ ମାଘ ମାସକୁ 

ସଂଞ୍ଜ ସକାଳର      ହାଡଭଙ୍ଗା ଶୀତ 

      ଆସଇ ମାସ ଶେଷକୁ ।

      

ସୁରୁଜ ନଇଁଲେ      ଗରମ ପୋଷାକ 

      ସଭିଙ୍କର ଲୋଡା ହୁଏ 

ଶୀତୁଆ ପବନେ     ଜାକିଯୁକି ହୋଇ 

      ଦିନ ସବୁ ହଜି ଯାଏ ।

ପୂଜା ଓ ପରବେ     ବେଦ ଓ ମନ୍ତ୍ରାଦି   

     ସାଥେ ଶୁଭୁଥାଏ ଗୀତ 

ଖୁସି ମଉଜରେ      ପରବକୁ ପାଳୁ

     ଆମେ ତ ଶୀତର ମିତ ।

         

ଫୁଲ,ଫଳ ନାନା     ପରିବା ପତର 

      ଆମକୁ ସେ ଦେଇଥାଏ 

ପାଚିଲା ଧାନର      ହଳଦିଆ କ୍ଷେତ 

      ମନହାରି ନେଉଥାଏ ।

ଚଷା ଭାଇ ଆମ      ଶୀତକୁ ଜାବୁଡି 

      ବିଲ ଆଡେ ଯାଏ ମାଡି 

ଧାନ ଅମଳରେ       ଲାଗିଥାଏ ସଦା 

      ଚାଦରକୁ ସାଥେ ଭିଡି ।

       

ସୂର୍ଯ୍ୟଙ୍କର ତାପ      ଧିରେ ଧିରେ ବଢେ 

      ମନେ ଉନ୍ମାଦନା ଭରେ 

ସମୟ ଚକ୍ରରେ      ଉଭା ଋତୁ ରାଜ 

      ମାଘମାସ ଅନ୍ତ ପରେ ।