ତେଲିଆ ମୁଣ୍ଡରେ ତେଲ

ତେଲ ଆଜିକାଲି ଅସଲି ନକଲି

ଦାମ ତାର ଡାକ ଛାଡ଼ୁଛି 

ଅଧିକ ଦାମର ନକଲି ମାଲଟି

ଅସଲି କୁ ନାତ ମାରୁଛି ll

               ଭୋକ ବିକଳରେ ଚାଟୁଛି ତାଟିଆ

                       ତେଲିଆ ମୁରୁକି ହସେ

               ଗରିବ ପାଉନି  ମଙ୍ଗଳ ଯୋଜନା

                     ଧନୀ ପକଟରେ ପଶେ ll

ଅଶୀ ବରଷରେ  ଭତ୍ତା ପାଞ୍ଚଶହ

ଖଟିଲେ ମଜୁରୀ ପାଏ ତିନିଶ

ସାହେବ ବାବୁର ବଢିଛି ମହଙ୍ଗା

ଏକ ଲକ୍ଷ ପାଏ ମୋଡିକି ନିଶ ll

                 ଦରିଦ୍ର ପାଉନି  ଗରିବ ଆବାସ

                       ଫୁଟପଥ ପରେ ଶୁଏ 

               କୁଜିନେତା ହିରୋ ପାଏ ବାରମ୍ବାର

                      ଟଙ୍କାକୁ ଧରିକି ଗିଳେ ll

ବ୍ୟାଙ୍କ ଦେଉଅଛି ଅନେକଯେ ଋଣ

ଶିଳ୍ପପତି, କଣ୍ଟ୍ରାକ୍ଟର ଯେ ମାଲାମାଲ

ବେକାରୀ ମାଗୁଛି ବେପାର ପାଇଁକି

କରଜ ନ ପାଇ ହୁଏ ସେ କଲବଲ ll

               ବାକି ରଖି ପାଏ  ଟଙ୍କାଯେ ରିହାତି

                      ମୁକ୍ତରେ ପାଏ ସମ୍ମାନ 

              ଧନ୍ୟ କୋଟିପତି କଥା ଜଳେ ବତୀ

                       ନିନ୍ଦିତ ହୁଏ ନିର୍ଦ୍ଧନ ll

ଟଙ୍କା ଦେଇଦେଲେ ସବୁକିଛି ମିଳେ 

ଚାକିରୀ ବାଣିଜ୍ୟ ସେବା ହାତ ପାହାନ୍ତାରେ

ଗରିବ ଛାତ୍ରଟି ପଢି ପଢି ପାଠ

ଦାଦନ ହୋଇକି ଖଟେ ଦେଶ ବିଦେଶରେ ll

               

               ଅନୁକମ୍ପା ବିନା ଗରିବ ଶ୍ରମିକ

                   ପାଏନି ସେବା ରୋଗରେ

              ନେତା ମନ୍ତ୍ରୀ ଯନ୍ତ୍ରୀ ଆମ ପଇସାରେ

                     ଅୟସ ବିହାର କରେ ll

      ଯିଏ ଖାଉଛନ୍ତି ସର ଛେନା ଝିଲ୍ଲୀ

         ତା ପାଇଁ ରହିଛି କ୍ଷୀରି

      ଯିଏ ପାଉନାହିଁ ଶାଗ ଭାତ ମୁଢି

         ଦେଖେନା କେହିତା ଶିରୀ ll

ଆମ ଦେଶ ତନ୍ତ୍ର  ଅଟେ ଗଣତନ୍ତ୍ର

ସମାନ ସୁବିଧା ସଭିଙ୍କ ପାଇଁ

କାଗଜର ଲେଖା ଶୁଣିବା ସୁନ୍ଦର

ହତାଦର ପ୍ରଜା ହୋଇବା ପାଇଁ ll

              ସରଂକ୍ଷଣ ବଳେ ଅଯୋଗ୍ୟ ପାଉଛି

                    ଚାକିରୀ ପରେ ଚାକିରୀ

               ଯୋଗ୍ୟତା ଥାଇକି ପ୍ରତିଭା କାନ୍ଦୁଛି

                       ପ୍ରତିଦିନ ମରି ମରି ll

ନେତା ଯନ୍ତ୍ରୀ ମନ୍ତ୍ରୀ ସମ୍ପତ୍ତିର ଗତି

ଅସମ ବେଗରେ ବଢେ ଦିନରାତି

ଗରିବ ବଢୁଛି ଅଭାବୀ ମାଗୁଛି 

ଚାଉଳ ପାଇଁକି କାକୁତି ଵିନତୀ ll

                 କୁକୁରର ଖାଦ୍ୟ ସାଅନ୍ତ ବାବୁର

                      ଗରୀବର ସାତସ୍ବପ୍ନ

                ବାବୁ ପାଉଛନ୍ତି ସୁବିଧା ସୁଯୋଗ

                      ଗରୀବର ନାହିଁ ମନ ll

ଛଅ ହଜାରରେ ଖଟେ ମାସେ ମାସେ

ଆନ୍ଦୋଳନ କରେ ବଢିବା ପାଇଁ

ବାବୁଙ୍କର ଭତ୍ତା ବଢେ ଛାଏଁ ଛାଏଁ

ବସିକରି ପାଏ ହିସାବ ନାହିଁ ll

  

    ଆରେ ସରକାର ସ୍ୱାର୍ଥ ତ୍ୟାଗ କର

        ଅସଙ୍ଗତି ଦିଅ ହଟାଇ

    ଦେଶର ଅର୍ଥରେ  ସଭିଙ୍କର ହାତ

        ଭେଦ ଭାବ ଦିଅ ମିଟାଇ ll