ଆମେ ଗଢ଼ି ଦେବୁ ଦେଶଟିଏ
ଆମେ ଗଢ଼ି ଦେବୁ ଦେଶଟିଏ
ସବୁଠୁ ସୁନ୍ଦର ବିଶ୍ବରେ ମହାନ
ଆମେ ଗଢ଼ି ଦେବୁ ଦେଶଟିଏ
ଯାହାକି ରୂପରେ ସୁନା ସମ ଦିଶି
ହୋଇବ କୋଟିକରେ ଗୋଟିଏ ।
ସଭିଙ୍କୁ ଏକତା ଛନ୍ଦରେ ଛନ୍ଦିବୁ
ହୃଦେ ନରଖି ଭେଦ ବିଚାର
ଭଲ ପାଇବାର ଅଭିମନ୍ତ୍ରେ ମନ୍ତ୍ରି
ହୃଦୟ କରିବୁ ପରିଷ୍କାର ।
ପରସ୍ପର ହାତ ଧରାଧରି ହୋଇ
ପ୍ରଗତି ପଥେ ଯିବୁ ଆଗେଇ
ପଛୁଆ କାହାକୁ ଦେଖିବୁନି ନେତ୍ରେ
ସହଯୋଗ ଭାବକୁ ଫୁଟାଇ ।
ମାଟିରୁ ଆକାଶ ଝଂକୃତ କରିବୁ
ଆମ ଲୁପ୍ତ ପ୍ରତିଭା ବିକଶି
ଉଦୟ ତପନ ସମ ଜଳି ଉଠି
ପ୍ରଭାକୁ ଜାଳିବୁ ହୋଇ ଖୁସି ।
କୃଷକ, ଶିକ୍ଷକ, ସୈନିକ, ଶ୍ରମିକ
ବୈଜ୍ଞାନିକ, ଚିକିତ୍ସକ ସର୍ବେ
ସଭିଏଁ ସମାନ ଅଧିକାର ଲଭି
ଆପଣାପଣରେ ବାନ୍ଧି ହେବେ ।
କାହାରି ମନରେ ବିଦ୍ବେଷ ଭାବନା
କିବା କ୍ରୋଧ, ଈର୍ଷା, ହିଂସା ଭାବ
ନରଖି ଚଳିବୁ ପ୍ରୀତି ମମତାରେ
ତୋଳି ଚାଲିବୁ ଶାନ୍ତି-ବିଭବ ।
ଅସହାୟ ଦୀନ ଦରିଦ୍ର କେହି ବି
ରହିବେନି ଆମ ଏ ଦେଶରେ
ଭିନ୍ନକ୍ଷମ ଯେତେ ସଭିଙ୍କୁ ଆଦର
ଯେଝାମତେ ଲାଗିବେ କର୍ମରେ ।
ହସି ଉଠୁଥିବ ସଭିଙ୍କ ପରାଣ
ଏମିତି ସୂତ୍ରରେ ବାନ୍ଧି ହୋଇ
ସର୍ବେ କହୁଥିବେ ଏମିତି ଦେଶଟେ
ଜଗତ ଭିତରେ ଆଉ ନାହିଁ ।
ଧନ୍ୟ ମଣିବୁ ଜୀବନ ଆମର
ଏ ଦେଶେ ଜନମି ପ୍ରତି କ୍ଷଣେ
ପବିତ୍ର ମାଟିରେ ପବିତ୍ର ହୃଦୟେ
ଦୀର୍ଘଜୀବୀ ହେବୁ ଜଣେ ଜଣେ ।