Library
Profile
ଆମଦାନୀ
ଆମଦାନୀ
ଏଇତ…
ସୁଖ ଆଉ ହସ ମାନେ
ଆମ ଆଡକୁ ଉଡାଣ ଝାଡିଲେଣି
ଟଂକିଆ ଚାଉଳ ଆଉ ସ୍କ୍ରେଜ୍ ଜିନ୍ ପ୍ଯାଣ୍ଟରେ,
ମହମ ବତୀର ଓଦାଳିଆ ସଳିତା ଭିତରେ,
ସାତ ସ୍ବପ୍ନ ଭାଗବତ ଘରେ |
ଗରିଲେଟ୍ ରେ ସେଦିନ ଝୁରି ମାରୁଥିବା
ଆମର ରଏବାରୁ ଏବେ
ଆନ୍ଧ୍ର ଇଟାଭାଟିର ସୁପର ଭାଇଜର୍
ଯାହାର କି ପ୍ରତ୍ଯେକ କଥାରେ
'ଲେକିନ' ଆଉ 'ଫିର୍ ଭି' ର ଫୁତ୍କାର୍ |
କିନ୍ତୁ…ଏଇତ
ଆମକୁ ଆମର ଭାଗ୍ଯ ସ୍ବାଗତ କଲାଣି
ଜନ୍ମ ଦିନର ଶୁଭ ସଂଜ ବେଳାରେ
ମନବୋଧ ଚଉତିଶା, ମଥୁରାମଂଗଳରେ
କବିସୂର୍ଯ୍ଯ ଚଂପୁ ରସର- ଖରାପ ତୁ ହେଲୁରେ |
ଯଦିଓ ଆମର ଦେବାଦେବୀ ଏବେ
ମଦ ପାଉଚ୍ ପିଇଲେଣି
ତେବେ , ପଚାରନି
ଇଏ କି ପ୍ରକାର ଆମଦାନୀ ବୋଲି |
ହଁ…
ଭାବନାର ଛନ୍ଦେ ଛନ୍ଦେ
ଛନ୍ଦି ହୋଇଯାଏ ଜୀବନ ବୀଣାର ସୁର ,
ନିର୍ଣ୍ଣିତ ଚକ୍ରବ୍ଯୁହ ର ବିଭ୍ରାନ୍ତି ପରି
ନିର୍ବାକ୍ ସମୟ ର |
ତଥାପି…
ଏଇ ସମୟର ଆଳାପ ଭିତରେ
ଏଠି ସଂଯତ ଭାବନା ଓ ପ୍ରତ୍ଯୟର ଝଳଝଳ ସ୍ରୋତ ;
ବିନ୍ଦୁ ନୁହେଁ କି ବଳୟ ନୁହେଁ
ବରଂ , ଅନେକ ସମୟରୁ
ଅନାଇ ବସିଥିବା
ପ୍ରସ୍ତୁତିର ପାର୍ବଣରେ,
ପ୍ରଶସ୍ତ ଫଗୁଣର ଯୌବନ ବକ୍ଷରେ ,
ରାଧେଶ୍ଯାମ ନାଁ କୁ ଫୋପାଡି
'ରାଜ୍' ଶବ୍ଦର ଆମଦାନୀରେ ,
ପୁଣି ,ତା' ଛତରା ମୁଣ୍ଡ ବାଲର
ନାଲି ନେଲି ମେହେନ୍ଦି ରଂଗ ରେ |
