ନୂଆ ପୁରୁଣା
ନୂଆ ପୁରୁଣା
ମୋ ପାଇଁ
ନୂଆ ପୁରୁଣା ସବୁ ସମାନ
ନିତ୍ଯ ନୂତନ ଆଶା ଆଉ ବିଶ୍ବାସକୁ ନେଇ ହିଁ
ଏଇ ମୋର ଜୀବନ ।
ମୋ ପାଇଁ ସବୁଦିନ ସମାନ
ସେ ବର୍ତ୍ତମାନ ହେଉ କି ଅତୀତ ,
ମୁଁ ଯେ କିଛି ପାଇବା ପାଇଁ ଆଶାରେ ଆସକ୍ତ
ପୁଣି ,
ନ ପାଇବାର ଆଶଙ୍କାରେ ବି
ସଦା ଜର୍ଜରିତ ।
ଦୁଃଖର ଦିନ ଗୁଡିକ ଯଦିଓ ଗଡିଗଲା
ତେବେ ଭାବେଁ- ସବୁ ଭଲ ହେଲା ,
ଆଉ
ସୁଖର ଦିନ ଗୁଡିକ ଯଦିଓ ଗଡିଗଲା
ତେବେ ଭାବେଁଁ-
ଏଇଟା ବି ବହୁତ ଖରାପ ହେଲା ।
କାଳେ ସୁଖର ସମୟ
ଆହୁରି ଟିକେ ଅଟକି ଯା'ନ୍ତା କି ,
ଏଇ କଥାକୁ ବୋବାଳି ବୋବାଳି
ମନ ବି ହୋଇଥାଏ ଦିକିଦିକି ।
ମୁଁ ବି ଜାଣେ ସୁଖ ଘୋଡାରେ ଯାଏ
ଆଉ ଦୁଃଖ ହାତୀରେ ,
ତଥାପି ନିତ୍ଯ ନୂତନ ଆଶା ଆଉ ବିଶ୍ବାସ
ଅହରହ ଜଳୁଥାଏ
ମନ ଆଉ ଭିତର ଛାତିରେ ।
ସେଥି ପାଇଁ ଲାଗେ ମତେ
ନୂଆ ଓ ପୁରୁଣା ସବୁ ଏକା ଏକା ଭଳି ,
ଦହି ବିଳେଇଲା ପରି
ଅତୀତ ଓ ବର୍ତ୍ତମାନ
ସବୁ ସୁଖ ସବୁ ଦୁଃଖ ହୋଇ ଥାଏ ବିଳି ।
ସେଥିପାଇଁ , ହିସାବ ମୁଁ ରଖେ ନାହିଁ
ନୂଆ ଓ ପୁରୁଣା ଏଠି ସବୁ ତ ସମାନ ,
ଆଶା ସାଥେ ଅହରହ ଝୁରୁଥିବ
ବର୍ତ୍ତମାନ ଟିଏ
ଆଉ ଅତୀତ ପାଲଟି ଯିବ ସ୍ମୃତିର ସ୍ପନ୍ଦନ |