Library
Profile
ଆମ ସଭିଙ୍କ ଏ ଜୀବନ
ଆମ ସଭିଙ୍କ ଏ ଜୀବନ
କିଛି ସ୍ମୃତି କିଛି ଅନୁଭୂତି
ଏ ସବୁର ସମ୍ମିଶ୍ରଣେ
ଆମ ଏ ଜୀବନ
କିଛି ନୀତି ନୈତିକତା
କିଛି ପ୍ରୀତି ପରିପପକ୍ଵତାର
ମିଶ୍ରଣେ ସତେ ଗଢା
ଆମ ସଭିଙ୍କ ଏ ଜୀବନ ।
କେତେବେଳେ ଚଳଚଞ୍ଚଳ
ଆମ ହୃଦ ପ୍ରାଣ ମନ
କେବେ ଶାନ୍ତ କେବେ ଅଶାନ୍ତ
ଆମର ଏ ସଂଘର୍ଷ ମୟ ଜୀବନ
ଏଇ ବୋଧେ ସଂଜ୍ଞା
ଏଇ ବୋଧେ ପରିଚୟ
କରି ମୁଁ ପାରେନା ସଂଜ୍ଞା ନିରୂପଣ
ସତ ମିଛର ଦୋଛକିରେ
ବିତିଯାଉଥିବା ଦିନ ଗୁଡିକର
ଅନ୍ୟ ନାମ କି
ଆମ ସଭିଙ୍କ ଏ ଜୀବନ ?
କିଏ କେତେ ସଫଳ
କିଏ କେତେ ବିଫଳ
ସଫଳ ବିଫଳର କାହାଣୀ
ନୁହେଁ କି ଆମ ସଭିଙ୍କ ଏ ଜୀବନ
କେତେ ବାସ୍ତବ କେତେ ଅବାସ୍ତବ
କେତେ କଳ୍ପନା ଆଉ ପରିକଳ୍ପନା
ତା ଭିତରେ କଟିଯାଉଥିବା
ସମୟ ଗୁଡ଼ିକର ଅନ୍ୟ ନାମ କି
ଆମ ସଭିଙ୍କ ଏ ଜୀବନ ?
ପିତା ମାତା ବନ୍ଧୁ ପରିଜନ
ପତି ପତ୍ନୀ ସନ୍ତାନ ସନ୍ତତି
ସମ୍ପର୍କର ଡୋରି ରେ
ବନ୍ଧା ନୁହେଁ କି ଆମ ଏ ଜୀବନ
ମାୟାର ପରିଧି ମଧ୍ୟେ ଧାଇଁ ଧାଇଁ
ଅଣନିଃଶ୍ବାସୀ ହେବାର
ଅନ୍ୟ ନାମ ନୁହେଁ କି
ଆମ ସଭିଙ୍କ ଏ ଜୀବନ ?
ଜଳିବା ଜାଳିବା
ନିନ୍ଦା ପ୍ରଶଂସା ଭିତରେ ବଞ୍ଚିବା
ହାରିବା ଜିତିବା
ଉତ୍ଥାନ ପତନ ଦେଇ
ସମୟ ବିତେଇବା
ସ୍ଵାଧୀନତା ପରାଧୀନତାର
ବିଶ୍ଵାସ ଅବିଶ୍ବାସ କୁ ନେଇ
ଜୀଇଁବାର ଅନ୍ୟ ନାମ ନୁହେଁ କି
ଆମ ସଭିଙ୍କ ଏ ଜୀବନ ?
କେତେ ଦାର୍ଶନିକ ବୈଜ୍ଞାନିକ
କେତେ ସାହିତ୍ୟିକ
କରିଥାନ୍ତି ତର୍କ ବିତର୍କ
କିଏ କେତେ କରିଛନ୍ତି
ସଂଜ୍ଞା ନିରୂପଣ
ରଖିଛନ୍ତି ନାନା ବିଧ ମତ ମାନ
ବୁଝେନା ଏ ଅବୁଝା ମନ
ସତରେ କ'ଣ
ଆମ ସଭିଙ୍କ ଏ ଜୀବନ
ଆମ ସଭିଙ୍କ ଏ ଜୀବନ ?
