ଆମ ପିତାମାତା ଚଳନ୍ତି ଦେବତା

ଆମ ପିତାମାତା ଚଳନ୍ତି ଦେବତା

କିଏ ହେବ ତାଙ୍କ ସରି ।

ଆମ ହିତ ଲାଗି ଭାବନା ତାଙ୍କର

ମନେ ରହିଥାଏ ଭରି ।୧।

ଦେବତା କହିଲେ ଆମେ ଯାହା ବୁଝୁ

ଅଦୃଶ୍ଯ ସତ୍ତା ତାଙ୍କର ।

ଆମ ପିତାମାତା ଚଳନ୍ତି ଦେବତା

ଦୃଶ୍ୟମାନ ନିରନ୍ତର ।୨।

ଦେବା ଯାର କାମ ଆଉ ବତାଇବା

ସୁବିନିଯୋଗ ତାହାର ।

ମର୍ତ୍ତ୍ୟ ମଣ୍ଡଳରେ ଦେବତା ନାମରେ

ଜାଣନ୍ତି ତାହାଙ୍କୁ ନର ।୩।

ଅଦୃଶ୍ଯ ସତ୍ତା ଦେବତାମାନେ ସିନା

ଆମ ପିତାମାତାମାନେ ।

ଚଳନ୍ତି ଦେବତା ମରତ ଧାମରେ

ଏକଥା ରଖିବ ମନେ ।୪।

କଥାକୁହା ଆମ ଚଳନ୍ତି ଦେବତା

ଜନମରୁ ମୃତ୍ଯୁ ଯାଏଁ ।

ଆମକୁ ବଢାଇ କାଖେଇ କୋଳେଇ

ଯତ୍ନ କଲେ ଶେଷ ଯାଏଁ ।୫।

ଦିନ ରାତିକୁ ସେ ଏକ କରିଦେଲେ

ଆମ ହିତ ଭାବି ଭାବି ।

କି ଭାବରେ ଆମେ ପ୍ରତିଦାନ ଦେବା

କେହି କି ପାରିବ ଭାବି ।୬।

ଆମ ଭଲ ମନ୍ଦ ଆମ ସୁଖ ଦୁଃଖ

ସାଥିରେ ସେ ହେଲେ ସାଥି ।

ଢାଳି କୃପା ବାରି ଦୋଷ କ୍ଷମା କରି

ଆମ ହିତ କଲେ ନିତି ।୭।

ଆଶିଷର ଧାରା ଆମରି ଉପରେ

ଢାଳିଲେ ସେ ନିରନ୍ତର ।

ସରଗଠୁ ବଡ ପିତା ଧରଣୀଠୁ

ବଡ ସିନା ମାତା ମୋର ।୮।

ଆମ ପିତାମାତା ଚଳନ୍ତି ଦେବତା

ସେ କଥା କୁହା ଠାକୁର ।

ତାଙ୍କ ପାଦଧୂଳି ମୁଣ୍ଡେ ହୋଇ ବୋଳି

ସେବିବା ତାଙ୍କ ପୟର ।୯।